Impraktikal

Usa ka balaodnon ang giduso ni kongresista Rudy Caesar Fariñas sa Probinsiyano Ako Partylist nga nagtinguha paglakip sa swimming isip usa sa mga subjects ubos sa K to 12 basic education curriculum.

Tumong sa House Bill 7476 mao ang pagtudlo sa mga estudyante og langoy aron malikayan ang mga insidente sa pagkalumos.

Ubos sa balaodnon ni Fariñas, ang Department of Education (DepEd) gitahasan pagpakig-alayon sa National Disaster Risk Reduction and Management Council (NDRRMC) aron paggama og programa nga maglakip sa swimming lessons isip usa sa mga mandatory nga subject diha sa  tanang publiko ug pribadong mga eskwelahan.

Di na bag-o ang maong sugyot. Gani tataw nga kini kinopya ra sa kanhi balaodnon nga giduso niadtong 2017 ni kongresista Frederick Siao sa Iligan City.

Di man dautan nga tudloan ang mga estudyante unsaon paglangoy. Apan ang paghimo niini nga pinugsanay isip usa sa mga subjects ug pag-obligar sa tanang tunghaan pagtudlo niini maisip nga impraktikal.

Aron kini mapatuman nagkinahanglan og pasilidad ang mga tunghaan sama sa swimming pool.

Unsaon pagtudlo sa mga tinun-an og langoy kun way pasilidad? Lisud sad og anha sila magkapakapa sulod sa classrooms o ba kaha sa playground.

Dunay mas daghang butang nga angayang unahon ang DepEd kay sa pagbuhat og swimming pool. Dako pa ang kakuwangan sa mga lawak saringan ug sa mga magtutudlo nga nagkinahanglan og pundo.

Ang paglangoy mahimo ra nga makat-onan sa mga tinun-an nga di kinahanglang ipamugos isip kabahin sa curriculum.

May laing mga programa sama sa scouting nga magimong didto sila makakat-on niini. Ang scouting dako og ikatabang pag-develop sa usa ka tinun-an nga mamahimong mapuslanon nga mga molupyo ug lider sa katilingban sa umaabot.

Usa ko sa mga nakabenepisyo sa programa sa scouting panahon sa elementarya ug high school.

Daghang butang, lakip na niini ang paglangoy, akong nakat-onan pinaagi sa training sa boy scout.