EDITORYAL - Kumosta ang F2F classes karong ting-init?

Naglagiting na kaayo ang kainit sa adlaw karong panahona nunot sa opisyal ng pagsulod sa panahon sa ting-init. Tungod niini, siguradong mosaka ang panginahanglan sa tubig sa tanang mga ginbuhaton sa tawo.

Apan samtang tinuod nasayod na ang tanan bahin niining panginahanglan, pirmeng mataligam-an o wala mahatagi og pagtagad ang aktwal gyud nga panginahanglan sa lawas mismo sa tawo.

Ang lawas sa tawo ginama og 70 porsiyentong tubig mao nga gikinahanglan kaayo nga makainom og dili momenus walo ka basong tubig o moabot 3.7 litrong tubig kada adlaw. Dunay mga nag-ingon nga kinahanglang upat ngadto sa lima ka litrong tubig ang imnon sa panahon sa grabeng ting-init. Apan ang 3-4 litrong tubig paigo na aron dili maughan ang lawas sa tawo.

Seryuso kaayo ang heat stroke ug dehydration o pagkauga sa fluids sa lawas, kay kini moresulta sa komplikasyon sa daan ng gihambing mga sakit o tinagoang sakit nga wala pa mopakita og sintomas, ug posible sab makamugna og sakit diha sa himsog unta nga lawas.

Usa sa kinahanglang hatagan og pagtagad mao ang mga tinun-an sa eskuylahan. Kinahanglan gyud silang pabawnon karong mga panahona og daghang tubig mainom.

Dili kalikayan nga ang mga bata magkiat gyud pirme ug kini panington og maayo, nagpasabot nga nagsige og pagawas og tubig ang lawas aron kini pabugnawon kay natural kining depensa sa lawas mao nga kinahanglan kaayong magbawon og tubig.

Sa sa pikas bahin, kinahanglang pun-an sa mga eskuylahan ang supply sa ilang tubig mainom, importante kaayo nga duna silay limpyo ug luwas nga tinubdan sa tubig sa panahon sa tingklase aron duny mainom ang mga bata. Angay hinumdoman nga gibalik na ang face to face classes diin ang matag classroom dunay 40-50 ka tinun-an, ug kining kakuwang sa mga lawak-saringan nakapuno sab sa problema sa panaghuot.

Kinahanglan sab nga pun-an ang ilang ventilation systems sama sa electric fans, mga bintana ug uban pa nga makapamenus sa grabeng kainit sa sud sa mga lawak saringan. Nasayran nga sukad sa pagsud ning ting-init karong buwana, naobserbahan ang pagdaghan sa mga tinun-ang mi-absent tungod sa grabeng kainit sa panahon tungatunga sa ilang klase.

Ang uban dili ka pokus sa ilang klase, ang uban luya ang lawas tungod sa kaalimuot, naglabad ang ulo, dunay gipangsunggo, ug uban pa.