Dili na gyud ta angay’ng mokumpiyansa karon. Tan-awa ang nahitabo ni Manguiao, Asturias Barangay Captain Mario Tundag ug sa iyang asawa, gipamusil sila samtang nagsakay’g motor.
Gisundan lang sa duha ka tawo nga nagsakay sab og motorsiklo og gikalitan pagpusil. Ambot unsaon kaha paglikay nato kon ingon niadto ang himoon sa mga nagplano kanato og dautan?
Kon aduna kay back-up nga magsunod nimo, kana tingali pwede nga maalkontrahan, ug posible pa nga maoy mapatay ang mga nagtinguha og daotan nimo. Pero kon ikaw lang, lisud gyud.
Dili man sab mahimo nga ang tanang dapit butangan og polis kay pipila ra ang atong kapolisan ug wa gani matuman ang gilatid nga “police-to-population ratio” nga usa ka polis sa matag 1,500 ka tawo.
* * *
Pahimuslan nako ang pagpasalamat sa mga sakop ni Apas Barangay Captain Virgil “Jingjing” Cabigon nga gipangulohan ni “Konsehal” Rey Suelto kay gisemento gyud tawon nila ang bati kaayong karsada sa among sitio.
Tinabangay ang among gihimo. Mipalit sab mi og ba’as ug graba, unya sila si Kap ug si Rey, nagdala og semento. Kami sab nga mga lumolupyo nagtinabangay aron dili magutman ang mga nagtrabaho.
Nindot ang gihimo ni Kap Jingjing kay gikuha gyud niya si Rey nga maoy iyang “action man” sa paghatag og pagtagad sa mga reklamo gikan sa mga lumolupyo. Salamat Kap!
* * *
Uy, sa dili pa diay ko malimot, karong Domingo diay, Abril 19, 2023, Annual General Assembly sa Cebu Market Vendors Multi-purpose Cooperative.
Gipahibawo ko ni Sir Erwin Gok-ong, ang chairman sa CEMVEDCO nga ang ilang kalihokan sa gatusan nila ka sakop sa kooperatiba, adto himoa sa Golden Peak Hotel sa Gorordo Ave. Ang tanang opisyal sa CEMVEDCO gitahasan nga mohatag og report ngadto sa mga miyembro kabahin sa tagsa-tagsa nila ka katungdanan.
Giawhag sila ni Gok-ong nga ibutyag ang ilang mga nahimo ug ang ilang mga plano sa umaabot nga katuigan alang sa kabulahanan sa mga miyembro.
Dayon himoon sab ang pagpili og unom ka miyembro sa Board of Directors sa CEMVEDCO kang kansang termino mapupos na.
* * *
Duna pa’y umaabot nga reshuffling sa mga opisyal sa Cebu City government nga gituyo ni Mayor Michael Rama aron nga molambo pa ang serbisyo sa kagamhanan sa dakbayan.
Nakadungog ko nga ang akong amigo itudlo ni Mayor Rama ug dakong katungdanan. Buyno, nindot ni kay maayo nga moserbisyo ang maong opisyal. Ang tinuod, bisan kon nindot og mga pangandoy si Mayor Rama apan dili niya kini mahimo kon ang iyang mga sinaligan dili mohimo sa kinasing-kasing nga pangalagad.