Salamat sa pagdasig

Nibaha ang mga pagdayeg ug pahalipay ngadto sa duha ka mga tinun-an sa nursing sa University of Cebu tungod sa bayanihon nilang buhat pagluwas sa kinabuhi sa usa ka tindera og mangga sa sidewalk kang kansang liog giabis sa iyang kapuyo tungod sa naghingapin nga pangabubho.

Sila si Angyl Faith Ababat ug Kristianne Joice Noelle Ona nagbarog diha sa sidewalk sa Osmeña Boulevard niadtong Lunes sa hapon duol sa dapit diin naglingkod si Bernadeta Zamora samtang nagbantay sa iyang baligya.

Sigun sa mikatap nga video sa CCTV kalit nga miabot ang kapuyo ni Zamora nga si Edwin Salazar ug gigulgol ang iyang liog dayon sibat.

Salamat sa nagpakabana sab nga tawo didto sa dapit nga miabag sa mga awtoridad aron madakpan ang suspetsado.

Ang duha ka tinun-an daw sa nahasi tungod sa hitabo apan masabot sa video nga dihang ilang nakita nga nagkadugo na ang biktima dali nila kining gitabang hangtud nga miabot ang ambulansiya.

Tungod sa nagviral nga video sa ilang gihimo nakakuha og talagsaong atensiyon sa publiko ug lakip na sa mga opisyal ang ilang gihimo.

Ang kapolisan gitakdang mopasidungog nila ugma atol sa flagraising ceremony sa CCPO. Ang Konseho sa dakbayan pinaagi ni Konsehal Rey Gealon mipalabang sab og resolution nagpahalipay nila. Lakip ang kahugpongan sa mga nurses sa nasud miila sa ilang nabuhat.

Ug ang labing dakong ganti nga ilang madawat mao ang pagibawo sa kadagkoan sa UC nga hatagan sila og scholarship. Dako ning tabang sa ilang pagtungha labi pa sa ilang mga ginikanan tungod kay di lalim ang gasto sa tunghaan.

Ang gibuhat sa duha ka mga tinun-an nagtudlo nato nga walanpa hingpit mawagtang ang paglaom diha sa mga batan-on.

Nga niining panahon nga nagkahilis ang maayong pamatasan ug pagpakabana sa katawhan duna pay mga batan-on sama nilang Ababat ug Ona nga maoy posibleng paglaom sa nasud aron mabalik ang kanhiay nga kinaiya sa katiguwangan nga puno sa pagpakabana ug panginlabot.

Ug salamat sa makapadasig nga tubag gikan sa kadagkoan sa tunghaan ug sa mga opisyal sa gobiyerno. Hinaut nga pinaagi sa ilang gihimong pag-ila sa duha ka mga tinun-an makadasig ni dili lang sa mga batan-on kun dili natong tanan aron mohimo og mga maayong butang sa atong isig ka tawo.

Ug mas labing maayo nga ang kadasig dili magsukad sa bisan unsang materyal nga ganti ug pasidungog kun dili tungod kay mao ni ang natural ug angayan nga batasan sa usa ka tawo ug kristohanon.