EDITORYAL - Di makatarunganong paburot sa presyo

Naghinayhinay na og us-os ang presyo sa sibuyas bombay gikan sa P700 matag kilod niabot nalang og kapin P300 ngadto sa P400. Apan angay ba kining ipasalamat ug makampante ang tanan?

Gikan sa bulan sa Septiyembre hangtud sa miaging buwan, Disyembre sa miaging tuig nagpista sa ginansiya ang mga smugglers ug hoarders sa sibuyas bombay.

Mga dagkong bodega nga gipanagiya og mga negosyante giingong nasakpan sa mga tinugyanan sa Department of Agriculture nga nagtago og sinakong mga sibuyas bombay atol sa surpresang inspeksyon.

Apan subo lang usab nga dunay mga bodega nga unang nasakpang nagtago og mga sinakong sibuyas nakahimo sa pagpagawas niini, pagabot sa mga otoridad wala na diha ang mga bombay nga ilaha untang sakmiton.

Nagpasabot lang kini nga kining mga hoarders ug smugglers dunay mga kakunsabo diha mismo sa gobiyerno nga maoy tighatag og impormasyon kabahin sa umaabot nga raid.

Ingon niana kalawom ang kurapsyon, bahala og magantos ang katawhang Pilipino basta puno ilang bulsa samtang nagdawat og sweldo gikan sa buhis sa mga tawo. Ingon niana sila kahakog.

Ang nahitabo eskandalo aning supply sa bombay nakapahibulong sa mga nag-imbestigar. Giangkon nila nga dunay kakulangon sa suplay niini nianang mga buwana, apan alang kanila dili makatarunganon nga moabot sa P700 ang presyo sa matag kilo niini.

Sa ato pa, tinuyo gyud ang pagtago ug pagpugong sa pagbaligya niini sa kamerkadohan sa tuyo nga ipakitang nihit gyud kaayo. Ug ang pagsaka sa presyo ilabi na kinahanglanon kaayo kay naghinangat ang kapaskohan, dili na panumbalingon sa mga tawo.

Kinahanglan nga dunay ulo nga moligid aning eskandaloha, kay kung dili sampolan sa gobiyerno kining mga mapahimuslanong negosyante, ilaha na sab kining usbon ini og makakita og higayon u gang paantuson mao ang mga tawo.

Dili mahimong palabyon lang kini sa katawhang Pilipino. Naa na sa mga kamot sa mga naa sa katungdanan ang paghimo sa ilang mandato para sa kaayohan sa kinabag-an.