Sa pagpaila pa lang sa announcer nila ni kanhi three-time world boxing champion John Riel ‘Cuadro Alas’ Casimero (31 wins, 4 losses, 21 knockouts) ug ni Japanese Ryo Akaho (39 wins, 2 losses 2 draws, 18 knockouts), kinsa maoy magsangka sa main event, non-title fight ubos sa bantamweight division didto sa Paradise City Plaza, Incheon, Korea sa miaging Disyembre 3, 2022, giwarawara na ang mga gagmay’ng bandera sa Pilipinas sa nanambong nga Cuadro Alas supporters.
Sa unang rawon pa lang, naghagiyos na ang sinukliay sa mga suntok nila ni Akaho ug Casimero, diin tataw makita nga pareho silang aggressive fighters. Haskang nindota tan-awon! Walay gutling nga nasingitan og kalaay sa ilang matag huyad. Kada tiktak sa orasan nagdalit og tumang kakulba-kahinam sa tanang nanan-away.
Misamot kaagresibo si Casimero sa ikaduhang rawon. Daw tigreng gutom nga misulong sa Hapon ug mipaulan og mga solidong kumo nga nakapatulingig sa napahaatras nga Akaho, diin sa ilang pagdinumogay, wala tuyoa, na-head butt si Akaho.
Human masusi, gipadayon ilang payit. Pero wala pa gani makatarong og porma ang Hapon, gisugat na kinig puthaw’ng straight hook ni Casimero nga nakapabungog ni Akaho. Unya gipaloapan pag mga bug-at suntok kay gusto nang tumbahon si Akaho. Apan hangin ang naigo nga maoy nakapa-outbalance-hapla ni Casimero sa kanbas.
Giiphan gihapon sa repire si Casimero, bisag dali rang nakabangon sa tumang kaabtik. Ug igo na lang nakakatawa sa dili maong makiangayong pag-ihap. Nga maoy nakapamangtas ni Casimero pag-ayo. Resulta?
Nagkapulikig sagang si Akaho sa dili na mabangbang nga kakusog-kapaspas sa mga masuk-anong kumo ni Casimero. Mibarag, misandig sa ring ug misukol man tuod, pero klarong nasakitan-natarantar ang Hapon. Hinungdan, nga mipasangil na lang nga gi-rabbit punch siya ni Casimero, bisag braso ray nakatapyas sa iyang tangkugoi. Ug wala na mosukol.
Gidesisyonan sa judges nga ‘No contest’ ang maong away bisag klaro kaayong midaog via TKO si Casimero. Dili professional ang repire. Inay iphan ang misurender-nagdramang hapon, iya pa hinuong gipalingkod aron makapahulay.
Dakong insulto sa kalibotan sa pamoksing kining gibuhat sa repire ug judges. Dapat patubagon sila ning grabeng kontrobersiya nga ilang gitagik sa kasaysayan. Ug kon mamatud-ang sad-an, angay silotan!