“Thunder with a big heart”

Aniay opisyal sa kapolisan nga dili lang subbordinate ang pagtratar niya sa iyang ginsakpan kon dili usa ka amahan. Siya mao si Police Col. Ireneo Dalogdog ang director sa Cebu City Police Office.

Asa man ka anang librehon niya og kaon ilabi na sa paniudto ang tanan niyang mga tawo sulod sa kampo. Tinuod gyud ni kay nasaksihan ni sa mga tigbalita nga nag-cover sa CCPO.

Sa rooftop sa building nagpahimo siya og kusina o lutoanan sa pagkaon, anaa ang bugas ug ang mga sud-an nga susama gyud sa usa ka pamilya nga magdungan sila sa pagpangaon, ang maulahi mabinlan usab.

Nindot tan-awon nga sama sa usa ka amahan nga makigsalo sa mga anak ang ilang pangulo kinsa makig estorya sa bisan unsa nga isyu.

Sukad pa sa dihang sa CIDG-7 pa si Col. Dalogdog isip regional chief mao na kini ang iyang gihimo nga makigsandurot sa mga subbordinates.

Ang budget sa pagpakaon gikan mismo sa bulsa sa opisyal busa walay angayan ikasaway ang mga marites sa gasto sa pagpakaon sa mga pulis.

Dako na kaayo og matabang ang ingon niini nga pagtratar sa amahan sa kapolisan sa dakbayan ngadto sa iyang mga anak sa kampo.

Dili na makagasto ug dili na usab gikinahanglan nga moadto sa gawas kay mokaon sanglit gidalitan naman sila og pagkaon sa ilang hepe.

Unsa ingon niini ang tanan nga hepe maka “sanaol” naman lang pud ta sa kadako sa kasingkasing ni Col. Dalogdog. Kon sa Ininglis pa “Thunder With the big heart.”

Kong mosaway kita sa mga salawayon, angayan usab kita modayeg sa mga nakahimo og maayo ngadto sa ilang isig ka tawo.

Moingon ang uban nga para kana lang daygon? Bisan unsa ka gamay ang nahimo nga kaayohan alang sa uban, apan sa mga natandog niini priceless kini kay hinukad gikab sa kasingkasing ang kaayo nga wala magpaabot og balos

Matag usa kanato adunay soft spot sa atong kasingkasing nga ipatigbabaw alang sa atong isig ka tawo.

Ang tinuod nga lider dili lang isog sa panglawas kon dili adunay pagbati nga kabalo mohatag og importansya sa iyang mga tawo.