EDITORYAL - Kuwang sa implimentasyon

Man should be governed by laws. Apan unsaon man pagtuman sa mga tawo sa balaod kun mismo ang tigpatuman niini walay gihimo pagimplimentar niini?

Dinhi sa Pilipinas, wala magnihit og mga balaod, pwerteng daghana sa halos sa tanang aspeto sa kinabuhi sa mga Pilipino. Apan subo lang nga kadaghan sa mga gipanday ug napasar nga mga balaod, daghan niini ang wala gyud hingpit naimplimentar.

Dili lang ang Kongreso ang dunay pagkulang bahin niini, hasta pud ang mga lokal nga kagamhanan o local government units.

Daghan sa mga Sangguniang Panlungsod ang mipasar og daghang mga ordinansa pahaum sa ilang lokalidad ug ang uban pagpalig-on pa gyud sa daan ng mga nasudnong balaod.

Apan sila mismo sa LGUs, daghan og kuwang bisan nalang gani sa paghimo sa kun unsay mga nalatid sa mga probisyon sa ilang lokal nga ordinansa.

Ang kuwang sa mga lokal nga opisyal mao ang political will aron mapatuman ang gustong mahitabo sa ilang mga konstituwente.

Dili ba ang mga balaod o ordinansa gipanday, gidebatihan ug gipasar para sa kaayohan sa mas kinabag-an?

Usa sa maayong sanglitanan kining problema sa spaghetti wires sa mga siyudad dinhi sa Metro Cebu. Kaniadto kaning mga linya sa utilities naa ra gyud kilid sa karsada nga nagkutay sa mga poste.

Apan karon, mura na og spaghetti tungod kay naa gyud sa ibabaw sa tungatunga mga karsada nagkurus-kurus. Kun sa mga dagkong karsada daghan niini, samut na kun anha sa mga sudlonong bahin sa mga barangay.

Sagad niini, mga linya sa internet nga sago-sagol na, dunay gigamit pa apan duna say wala na apan nagpabiling nagbitay ug peligroso para sa tanan.

Apan dili kini maingon niini kun ang mismong mga barangay officials moestrikto aning mga utilities, kinahanglang ipatarong ug limpyo ang paginstalar sa mga linya, dili magkurus-kurus sa ibabaw sa mga karsada.

Nangatulog ra ang mga opisyales bisan nalang pagpasidaan sa mga linemen? Kung kuwang og tawo, nganong dili mag-hire para motutok aning tanan? Dili tugotan ang telco makainstalar og bag-ong linya kun dili nila tarungon og butang.

Pagkatinuod, nagmika ra ang mga barangay ug LGU officials pag-abot sa maong hisgutanan. Ebidensya ani kining mas daghang bag-ong gitaud nga linyang nakurus-kurus kun itandi sa mga hipos ug limpyong pagkataud.

Salamat Padre Bong

Palahi lang una kita karon. Kining atong lindog akong ipahinungod alang kang Padre Rodolfo Patiag, usa ka Rogasyonista. Siya ang akong spiritual director kaniadto.

Sa panahon sa akong mga kaguol ug mga pagduda siya ang naghatag kanako og giya. Dili ko makalimot sa iyang panultihon nga nagkanayon: “Let yourself be yourself and let God be God!” Ug hangtud karon padayon ko kining gidala dala bisan asa ka padulong.

Simple ra gyud si Padre Bong. Gani sa dihang nahimo nakong pari naghisgot hisgot kami kalabot sa Liberation Theology. Bugtong gisulti niya Kanako mao: “Be Careful.”

Bisan kun tua siya sa Italy alang sa iyang further studies padayon siyang nagsulatan Kanako. Anaa ang iyang mga pagdasig ug ang assurance nga ako iyang iampo. Napun-an ko og laing anghel sa langit. Salamat Fr. Bong.

Sa akong panaw sa kinabuhi daghang mga tawo ang nalambigit niini. Mga tawo nga sa kahilom nahimong dakong kabahin sa akong kulbahinam nga mga panaw.

Usa na si Padre Bong niini. Simple ra gyud nga tawo kadtong tawhana. Ang iyang ka simple makapadasig sa pag-alinggat nga ang kinabuhing simple maoy dugokan sa atong kinabuhing malinawon.

Ang simpleng kinabuhi sa usa ka pari nagtug-an nga dili na diay kinahanglanon nga magdato ka pag-ayo apan dili malipayon ang tanan alang kanimo. Si Padre Bong sanglitanan nianang maong birtud.

Nitulo man tuod ang akong mga luha apan ako nakaamgo sa buhing matuod nga ang kamatayon diay walay pilion bisan pa man kun ikaw batan-on.