Ipasulbad sa uban

Nangayo ang DOTr sa dugang pagsabot sa katawhan human mahilandig ang Metro Manila sa iwit nga pwesto sa Global Urban Mobility ranking. Anaa sa ika-58 ang Metro Manila sa 60 ka nasud nga gipaubos sa 2022 Urban Mobility Readiness Index survey. Dili ikahibulong ang maong ranking kay dayag ang kahinay sa gobyerno sa pagpangandam sa panginahanglan sa kalambuan. Bulawanon ang tambag sa akong higala nga, “Sa mga komplikado'ng isyu sama sa transportasyon, mas maayo pay magtagay og mabugnaw nga beer ug pasagdi ang uban nga maoy mosulbad niini”. Fezteleern!

Direksyon sa pag-gamit

Sumala sa survey nga gipahigayon sa OCTA Research, 85% sa mga hamtong nga Pilipino nagtoo nga nagdulong ang nasud sa “hustong direksyon” base sa mga programa ug polisiya nga gisagop ug gipatuman sa Marcos administration. Wala ipadayag kon unsa ang giingon nga “hustong direksyon”. Apan matud pa sa akong amigo, “Nganong mangutana man kita’g direksyon nga sayod man kita nga lingin ang kalibotan?” Angayan pahinumduman ang akong amigo sa pagya nga “Adunay mga tawo nga maoy hinungdan ngano nga butangan gyud og direksyon kon unsaon paggamit ang milk lotion”. Pagkatoytoy!

Tanan adunay rabies

Buot ni Quezon City 4th District Representative Marvin Rillo nga mopahigayon og congressional investigation sa giingon’g napakyas nga National Rabies Prevention Control Program nga gilusad 15 anyos na ang milabay. Wala makab-ot sa programa ang tinguha nga madeklarar ang Pilipinas nga ‘rabies-free’ sa tuig 2022. Dili gayud mahimong rabies-free ang Pilipinas tungod sa atong kustombre paghingalan sa bag-ong tuig og usa ka mananap, sama sa Year of the Monkey, Year of the Tiger, o Year of the Dog. Kining maong mga mananap aduna man gayo’y rabies. Gani, ginaingon pa gayod nga, “Lisod pangitaon ang tinuod nga gugma, ug kon mapalgan mo man kini, hayan aduna usab kini rabies”. Fishkots!

Dili apektado

Sumala sa legal opinion nga gipagawas sa Department of Justice, ilegal ang rekomendasyon sa NEDA nga ilisan ang de-kolor nga hulagway sa Philippine Identi>cation System ID ngadto sa black and white kon monochrome kay nahasupak kini sa lagda sa Government Procurement Act (R.A. 9184). Dili tinuod yano nga mausab ang probisyon sa kontrata busa angayan basahon ug tun-an sa dili pa pirmahan. Apan matud sa akong amigo, “Dili ma-apektohan ang down payment, bisan mausab pa ang hunahuna sa isig ka habig sa kontrata”. Madahaaan!

Boto bugti sa pasalig

Matud ni Presidente Bongbong Marcos, Jr., aduna pa siya’y bulohaton una siya mobiya sa Department of Agriculture. Wala pa matino kon unsa ang maong buhatonon apan mahinumduman ng misaad ang presidente nga paubsan ang presyo sa bugas. Gawas nga wala pa kini matuman, misaka pa ang presyo sa ubang produktong agrikultura. Ginaingon nga “Kon sambugan mo’g kamatuoran ang politika, dili na kini politika”. Ingon niana ang kahimtang sa demokrasya: ang politiko mangayo sa boto sa katawhan pinaagi sa iyang mga saad, ug ang katawhan usab mangayo sa saad sa politiko bugti sa ilang boto. Paleho la!