EDITORYAL - Lokal nga solusyon sa illegal drugs

Ang problema sa ilegal nga drugas klaro diha sa mga lokalidad, problema kini sa mismong komunidad diin naghitak ang ilegal nga drugas ug mga nagpadagan niini. Ang matag lokalidad adunay lain-laing sitwasyon ingon man estilo sa mga drug personalities sa pagbaligya sa ilang negosyo.

Mao nga ang Department of Interior and Local Government nanawagan sa mga LGS sa paghimo sa ilang kaugalingon ug tagsa-tagsa ka local anti-drug plan of action (LAPDA) nga mohaom sa ilang lokalidad.

Praktikal kaayo kini kay dili tanang formula mamahimong gamiton pagsulbad sa mga problema nga managlahi ang mga hinungdan ug mga tawong nalambigit.

Apan kinahanglan dili kalimtan ug dili ipadaplin lang ang hustong pagsunod sa proseso paghimo niini. Kanang pamaagi ug estratehiyang dili malapas ang batakang balaod o Konstitusyon ug ubang pang balaod sa nasud.

Tinuod nga sa pagkakaron nakat-on na sab ug mi-evolve ang mga nalambigit sa ilegal nga drugas. Nakat-on sab sila sa ilang mga kapalpakan sa nanglabay nga mga panahon ilabi na ubos sa administrasyong Duterte diin nahimong duguon ang war on drugs niini.

Daghan na kanila ang nangadakpan ug napatay, apan ang mga pabiling gawasnon nakat-on na ug nakakita og nagkalain-laing pamaagi kun unsaon pagpalusot ang ilang ilegal nga drugas sa mga destinasyon niini hangtud sa street level.

Ang LADPA kinahanglang naglangkob sa sitwasyon sa problema sa lokalidad aron makahimo og hustong desisyon;  paghimo niini nga prayoridad; prayoridad ang pagpakubos sa supply and demand nini; pagpangita ug pagsulbad sa hinungdan kun nganong nalambigit sa ilegal nga drugas, paghimo og mga kritikal nga polisiya, programa, proyekto, serbisyo ug uban pa apil na ang paggahin og pundo par gyud niini.

Samtang nindot kaayo kini pamalandungon nga nagpadayon ang anti-illegal drug campaign pinaagi sa nagkalain-laing mga estratehiya nga gustong ipatuman.

Apilon sab unta ang paghisgot sa ang pagsanta ug pagputol sa pagpangabuso sa mga otoridad sa paghimo sa anti-drug campaigns, ingon man pagtabang niadtong mga inosenteng biktima niining pagpangabusar.

Dili ikalimod nga daghang mga pagpangabusong nahitabo sa panahon sa war on drugs ni Duterte, gani, duna nay mga polis nga nakombikto niini. Apilon unta kini sa plano sa LGUs, ang pagprotihir sa mga inosente.