Katin-awan

Daghang senior citizens dinhi sa Cebu City, nagsige’g hangyo ni Mayor Michael Rama nga hatagan na usab sila og cash assistance kay aron magamit pagpalit og maintenance drugs. Atol sa pakigpulong ni Mayor Rama sa mga senior cizens nga nagsaulog karon sa Senior Citizens Month, nalooy ang mayor ug iyang gipahibawo nga mopahatag siya og tag P2,000 sa mga senior citizens.

Matud ni Mayor Rama nga gusto niya nga ang mga senior citizens malipay atol sa iyang birthday karong Oktubre 28, mao nga iatol niya ang pagpanghatag niini. Apan gipasabot sa mayor nga dili kini isipon nga iyang gift, kondili, gikan kini sa siyudad.

Ang ipanghatag nga tag P2,000 ngadto sa mga senior citizens, para kini sa buwan sa Septiyembre ug Oktubre karong tuiga.

* * *

Nahukman sa Cebu City Traffic Management Board nga himoan og kampanya ang mga tigbaligya og mga mufflers sa motorsiklo nga saba kaayo.

Nindot kaayo kini nga lakang kay nabantayan bitaw namo nga pwerteng sabaa niining ubang motorsiklo kay ang ilang mga mufflers wa na masubay sa lagda.

Mouban sa pagsuroy sa mga baligyaanan og piyesa sa mga motorsiklo ang mga sakop sa Business Permit and Licensing Section sa City Hall, ug ang PNP Highway Patrol.

Base ra ba sa ordinansa sa syudad, kadtong mamaligya og mga produkto nga wa masubay sa lagda, sama sa muffler nga dili makapahinay sa kasaba sa makina, pahamtangan og silot.

Ang silot nga ipahamtang sa siyudad maglakip sa pagkanselar sa business permit. Busa, karon pa lang daan, undanga na ninyo sa pagbaligya ning maong matang sa mufflers.

* * *

Laing nindot nga paagi nga gipatuman ni Mayor Michael Rama mao nga gidili na ang paggamit sa karsada nga butangan og mga tulda, unha anha mag-vigil sa mga mamatay. Bisan pa tingali og ang patay tua ra sa layo, pero magbutang gyud og tulda diha sa karsada, dili gihapon kana itugot kay makabalda man sa pag-agi sa mga sakyanan.

* * *

Unya, laing lakang sa Cebu City Traffic Management Board mao nga did-an na ang mga sakop sa Drum and Buggle Corps, kining mga banda, nga gikan silang magtukar, mag-parade gihapon pauli sa ilang gigikanan.

Hilabihan ka samok nga makabalda sa trapiko kay moukopar gyud sila og usa ka lane sa karsada, ug daw magmartsa gihapon. Ngano man gyud kuno nga magmartsa man mo pagpauli sa inyong gigikanan?

Basin nagtuo tingali ni sila nga daghan ang nakagusto sa ilang gihimo. Sayop mo kay daghan ang nangreklamo niini mao nga ang Traffic Management Board, moaksyon na niini.