Luna nga alang unta sa mga probinsyano

Human sa tulo ka dekada nga panagtigi nabalik na gyud kagamhanan sa lalawigan sa Sugbo ang luna nga gigamit sa Visayas Command diin gipahigayon ang turnover ceremony niadtong Lunes sa mga opisyal sa Department of National Defense kauban ang AFP Chief of Staff ngadto kang Cebu Governor Gwen Garcia kauban usab ang mga opisyal sa provincial government.

Hapsay ug han-ay ang turnover apan nakamugna kini og kabalaka sa mga nagpuyo sa luna sa Viscom nga nahimutang sa Barangay Apas sa dakbayan sa Sugbo.

Mismo si Apas Barangay Kapitan Virgil Cabigon niingon nga 5,000 ka mga residente apil siya ug ang ilang barangay hall ug tulo ka mga eskwelahan ang maapektohan ugaling papahawaon sila sa lalawigan.

Kini base lang usab sa ilang pangagpas nga posibleng mahitabo kay wala pa man sad sila ipatawag sa Kapitolyo sa mamahimo nilang kapalaran busa makigkita kuno sila sa gobernador aron mohangyo ugaling pabakantehan ang luna nga ilang giokupahan.

In fairness sa Kapitolyo wala man moluwat og pamahayag si Gov. Gwen Garcia sa plano nila kon unsaon ang luna nga nabawi gikan sa Viscom, wala usab niya tanduga ang isyu sa mga okupante.

Apan niuna man og hatag og pamahayag ang opisyal sa barangay dihang gikuhaan kini og pamahayag sa usa ka pamantalaan, seguro tungod pud sa ilang kahingawa.

Mas maayo unta kong gihuwat sa mga opisyal sa barangay ang pagpatawag kanila sa Kapitolyo o ba kaha niuna sila og adto sa kapitolyo aron mapadangat ang ilang hangyo o mahatagan sila og katin-awan aron mahupay usab ang ilang kabalaka.

Sa pamahayag sa gobernador, adunay win win solution ang kahimtang sa mga okupante basta estoryahan lang ug dili magsige og pagarpar o pa-victim, gani miingon siya nga dili siya i-antagonize o murag dautan na hinoon taw-awon sa uban.

Gipaneguro sa gobernador nga tahoron o i-honor niya ang memorandum of understanding sa mga orihinal nga mga occupants nga moabot ngadto sa usa ka libo sukwahi sa giingon sa baranggay nga singko mil.

Mas maayo nga likayan lang una sa mga hingtungdang molupyo ug mga opisyal sa barangay ang pagluwat og pamahayag nga posibleng ikasamad sa pagbati sa provincial goverment nga maoy tag iya sa luna.

Dili sad tampalasan ang gobernador nga palayason ang mga residente, sa giingon niya mahimo ra mang estoryahan ang tanan, bisan og dili mga botante sa probinsya ang mga residente apan parehong mga Sugboanon.

Ang nakabentaha lang sa mga occupants kay hayahay ang ilang kabutang sa luna nga iya sa probinsya sa Sugbo nga wala masinati sa lehitimong mga probinsyano.