Layko, lector manghatag ba sa offertory?

Ang santos nga misa sa Romano Katoliko nahisama sa usa ka dakong kumbira, diin ang nagselebrar sa maong balaang okasiyon mao mismo ang atong Ginoo. Tanang magtutuo, labi na sa Iyang mga piniling linalang sama sa nagkalainlaing ministry sa simbahan ug mandated religious organization, Iyang giimbitar sa pagtambong.

Gusto Siya nga kitang tanan makakaon diha sa kumbira nga Iyang gitagana matag Domingo, piyestang iglilihi ug ubang mga balaanong adlaw. Gusto Siya nga makakaon kita sa pan sa kinabuhi ug makainom sa bino sa kaluwasan.

Pero kadaghanan kanato, misalikway sa Iyang imbitasiyon kay maoy gipalabi ang pagpakighuboghubog uban sa kahigalaan, ang pagsigeg siyagit: “Sa puti, sa pula…” sa bulangan ug ang pag-enjoy the night when the price is right.

Hinuon, ning paglugak karon sa kanhi estriktong pagpatuman sa COVID-19 health protocols, hinayhinay nang namalik ang mga parokyano aron motambong sa kombira sa atong Ginoo kada Domingo.

Nahimamat ko na usab ang daghang manimbahay, mga layko, lectors, cantors ug ubang mangangalagad sa simbahan. Makalipay sud-ongon ang mga nanaglaray’ng nangaon sa lawas ni Kristo, kinsa misanong sa imbitasiyon sa Ginoo. Sa samang higayon, ubay-ubay ang wala mokaon. Busa, makapasubo!

Kon sa komuniyon, daghang dili moapil, mas daghan ang molingiwlingiw inig suroy sa love offering bag panahon sa opertoriyo. Apil na niini ang mga mangangalagad sa simbahan, kinsa nagtuo nga sila exempted. Nakalimot nga ang mga ordinariyong manimbahay nag-obserbar kanilang mga lector, cantor, layko, etc., kinsa mihimo kanilang sumbanan.

Di ba, mas nindot kon kitang mga mangangalagd sa simbahan maoy unang mohatag og voluntary gifts sa atong Ginoo aron ganahan mosunod ang atong mga kaigsuonan? Si Fr. Ciano Ubod sa San Vicente Ferrer Parish, Lilioan, Cebu, mitug-an nga porsiyon sa iyang stipend o suweldo, iya pong gi-offer sa Ginoo.

Kini tungod kay ang offertory ug communion kabahin man sa kinatibuk-ang Santos nga Misa. Kon ikaw dili moapil niini, sama ra nga imong gi-isnab ang imbitasiyon sa Ginoo pagtambong sa gipahigayon Niyang kumbira.

Busa, Brad, Sis, kamong lector, cantor, choir o layko sa mga simbahan, kaantigo bang motunol og love offering sa offertory? Nindot unta, nga ato kining batasanon! Buwahan, kompleto gayod ang pagpakig-uban nato Kaniya.