^

Banat Opinyon

Di diay tinuod nga hawod

ARANGKADA - Leo Lastimosa - Banat

Nahagba ang paningkamot ni Presidente Ferdinand Marcos Jr. pagpresentar sa iyang kaugalingon isip kampeyon sa agrikultura–arkitekto sa abundang suplay ug ubos nga presyo sa pagkaon. Ang pagtudlo sa iyang kaugalingon nga agriculture secretary gitumong pagkumbinser sa katawhan nga siya'y mangunay pagsulbad sa labing batakan nga problema sa nasud.

Pero ang krisis sa kanihit sa suplay ug pagdoble sa presyo sa asukar, imbes mohatag og higayon pagmatuod sa takos niyang liderato, nakabisto hinuon sa makahasol nga hulagway: Di diay siya ang tinuod nga tagduma sa krisis, ug posibleng sa tibuok administrasyon.

* * *

Gipabantang sa Malakanyang ang mga tigom sa presidente uban sa kadagkoan sa Department of Agriculture (DA), sa iyang pagtakda sa direksiyon sa pagpalambo sa produksiyon ug paglikay sa krisis sa pagkaon, labi na sa bugas ug karne, ug pagtabang sa mga mag-uuma ug mga mangingisda.

Pero hingpit siyang nawagtang dihang gipahibawo sa Malakanyang nga nalutsan siya sa ilegal nga resolusyon sa pag-import og 300,000 metric tons sa asukar. Naabtan siya og dul-an sa semana una naghisgot og asukar: Nga way kanihit ug unya pa sa Oktubre ang importasyon.

* * *

Human sa resignasyon sa tulo sa upat ka opisyal nga nipirma sa resolusyon, nitumaw nga ang sentro sa krisis sa asukar di ang presidente kon dili si Executive Secretary Victor Rodriguez:

• Siya ang nisugo ni Undersecretary Leocadio Sebastian pag-umol og plano sa importasyon sa asukar;

• Siya ang niyaka sa rekomendasyon ni Sebastian niadtong Hulyo 29 pagpagawas sa 62,826.60 metric tons nga asukar gikan sa bodega sa Sugar Regulatory Administration ngadto sa mga konsumidor; ug

• Siya ang nisugo sa Bureau of Customs pagronda sa bodega sa asukar sa Pampanga ug pagsakmit sa 140,000 ka sako sa asukar sakay sa barko gikan sa Thailand.

* * *

Unsa na man lay trabaho nga gibilin ni Rodriguez sa presidente? Ang pagbalitok.

Human nangangkon nga iyang gitun-an ang industriya sa asukar ug nipasalig nga way kanihit sa suplay, ug human gisukwahi sa tulo ka higanteng kompaniya sa softdrinks ug gipasidan-an nga mataktak ang mga trabahante kon mapiang ang mga industriya nga nagsandig sa asukar, ang presidente way laing kapilian gawas sa pag-angkon nga gikinahanglan gyud diay ang importasyon.

* * *

 [email protected]

FERDINAND MARCOS JR.

Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with