Dili tiaw ang nahitabo ning mga nilabay nga mga adlaw. Baha bisan asa linog pud bisan asa ug gani dunay mga dili kasarangang panghitabo mismo sa atong adlaw nga matud pa nagkahinay na. daghang mga solar explosions nga nahitabo ug mao nga nakaapekto kini sa mga nagkadaiyang seismic activities. Mao tingali ni nga daghan ang linog. Daghan usab ang nabiktima sa mga kilat, buhawi ug uban pa. Sa laktod nga pagkasulti, dili lalim labina kun ang katalagman na ang mahitabo sama sa linog. Gawas sa dangan niini sa kabtangan, samot na tingali ang kinabuhi. Wala pay labot sa trauma nga mahiagoman sa mga biktima.
Dunay mga pagtulon-an nato gikan niining mga hitaboa. Naglangkob kini ning mosunod:
1. Tiguwang na ang kalibotan ingon man kitang mga tawo. Sa laktod dunay kinutoban ang tanan. Busa mangandam lang kita alang niini.
2. Kabahin sa cycle sa atong planeta ang mga panghitabo sama niini. Nagpasabot lamang nga bisan unsa pay atong himoon wala kitay ikapanagang kun ang kalikupan na ang maningil.
3.Ang pagkahimatngon lamang ang kinahanglanon ug hustong kahibalo kalabot sa katalagman aron makahimo kita og tukmang mga lakang sa pagsagubang niini.
4. Ang pag-ampo nga unta mahatagan kita sa kaisog aron sa ingon mamahimo kitang makasugakod ug makadawat sa mga butang ug panghitabo nga taliabot.
5. Wala kita masayud sa tukmang panahon o takna mao nga matag adlaw kahigayonan sa pagpuyo sa kinabuhing mabungahon.
Kun ang kalibotan matay-og ang atong kinabuhi usab mamahimong tay-og labina kun haguka nang daan ang atong tagsa tagsa ka mga baruganan. Ug kun ugaling kini mahitabo unta ang Dios na lang ang bahala.