Nganong makigsulti pa sa China

Nakigtagbo si Transport Secretary Jaime Bautista ni Chinese Ambassador Huang Xilian niadtong miaging semana diin ilang nasabotan ang pagsugod sa sabot-sabot alang sa major transport nga proyekto lakip na ang possible nga maritime cooperation nga proyekto tali sa duha ka mga nasud.

Lakip sa mga major nga proyekto mao ang mga na-terminate nga proyekto sama sa Philippine National Railway South Long Haul Project or the PNR Bicol, Subic-Clark Railway Project ug Mindanao Railway. Kining maong mga proyekto nabiyaan human ang China mipatong og tulo ka porsiyento nga interest rate nga mas taas kun ikumpara sa 0.1 porsiyento nga gipatong sa Japan sa mga nasud nga ilang gipautang.

Si PAMALAKAYA National  Chairperson Fernando Hicap midemanda sa pagpahunong sa pagpakigsabot-sabot sa China hangtod nga mamahawa sa West Philippine Sea ug respitoon sa China ang katungod sa mga Pinoy nga mananagat nga nanagat sa teritoryo sa Pilipinas.

Sa tan-aw ni Hicap, ang dugang ekonomikanhon ug proyektong pang inpraspraktora sa China makadugang kini og kompromiso sa baruganan sa Pilipinas sa isyu sa West Philippine Sea. Kinahanglan nga seguroon sa gobiyerno sa Pilipinas nga ang utangon sa nasud ngadto sa China nga ipundo sa mga proyektong pang inpraspratura maka-kompetensiya kun ang sabot-sabot  ipadayon.

Kun ako lang ang pabot-on dili na ko mangotang sa China alang sa akong mga proyektong pang inpraspraktura tungod kay una, taas ang interest nga gipatong sa China sa ilang gipautang kun ikomparar sa interest nga gipatong sa Japan sa ilang gipautang.

Ikaduha, ang pagpangutang sa Pilipinas sa China makatampo sa pagpalambo sa ekonomiya sa China nga nagilog sa atong teritoryo. Makadugang kini sa nagtumpi nga salapi sa China nga possible nilang gastoon sa pag-angkon sa lain pang mga isla sulod sa teritoryo sa Pilipinas nga giangkon sa China.