Usa ug tunga ka buwan human nibanos ang bag-ong administrasyon sa Malakanyang, nabantang nga wa silay bag-ong nga mga ideya unsaon pagpalambo sa pagpamakuna batok sa Covid-19. Nagpadayon ang kaluya sa pamakuna sa dayong panamilit sa niaging administrasyon. Kon wa man mas nisamot pa.
Kada buwan magsige na lang og ihap ang Department of Health (DOH) sa mga bakunang nihupas ug di na kapuslan. Karong buwana, niabot na og 20.7 milyones ka doses sa Covid-19 vaccines ang nausik. Ang balor sa mga bakunang di na magamit: P10.3 bilyones.
* * *
Apil sa nausik ang mga bakuna nga:
• Kinompra sa gobyerno (ginamit ang binilyon ka pesos nga utang nga pas-anon ug kinahanglang bayran sa katawhan sa mosunod nga 25 ka tuig);
• Pinalit sa pribadong mga kompaniya (nga mahimong napakyas pagkumbinser sa mga trabahante sa pagpabakuna o naapsan sa panahon kay nisuway og paginansiya sa mga bakuna); ug
• Hinatag sa ubang kanasuran (sa pagtuo nga takos ang atong gobyerno sa paspas nga pagpamakuna, maong nahikawan ang ubang kanasuran nga wa pa kasugod pero mas takos ug mas kugihan unta nga mamakuna).
* * *
Imbes maalarma sa nagkadaghang bakuna nga nihupas, ang DOH igo lang nipasalig nga normal nga dunay mausik nga mga bakuna. Gipasigarbo pa nga wa tang kaabot sa limitasyon sa World Health Organization nga 10% sa tanang bakuna.
Pero hapit madoble ang gidaghanon sa mga bakunang nausik sa niaging duha ka buwan: 8.4% sa Agosto, gikan sa 4.7% sa Hunyo. Peligrong malapas nang 10% sa mosunod nga mga buwan.
* * *
Makapasubo nga ang kadasig sa pagpamakuna kutob na lang sa sulti sa mga opisyal sa nasudnong gobiyerno. Wa na gani mo-ulog-ulog og sabat ang lokal nga mga opisyal. Si DOH OIC Maria Rosario Vergeire morag naglaom na lang nga ang pag-usab sa ngan sa kampanya ngadto sa PinasLakas maoy milagrong makapaspas sa pamakuna.
Kon moadto ka sa vaccination sites, samang makalibog nga mga lagda ang mosugat nimo: Para ra ni sa mga bata, ang mga dagko tua sa laing site; senior citizens ug mga masakiton ray makapa-booster, wa pay pagtugot ang DOH pag-booster sa general population; ug, ang kinaham nga pamalibad, way barangay clearance way bakuna.
* * *