Makasagmuyo kaayo ang mga gipanglimpyohang mga kasapaan ug mga dagkong kanal sa Cebu City. Kabahin unta kini sa lapad nga Drainage Master Plan para sa Sugbu nga ang tumong mao ang pagkontrol sa baha.
Kini gumikan kay naa lang gihapoy mga tawong magsige og labay sa ilang mga basura diha sa mga kasapaan. Kun ingon niini ang kinaiya sa mga tawo, bisan unsa pay buhaton sa gobiyerno wala gyud gihapoy padulngang maayo.
Unya reklamador kaayo ang mga tawo panahon nga tinguwan kay lagi, lunopan sila sa tubig, kay ang ilang mga kanal nabara na sa mga basura ug lapok.
Mabasol sab niini ang mga barangay officials tungod kay wala gyud nila matisok sa alimpatakan sa ilang mga konstituwente ang kabahin sa pagpanglimpyo sa mga agianan sa tubig matag karon ug unya.
Nagsalig lang ang katawhan nga molihok ang siyudad para manghabwa sa mga baradong sapa o kanal, inay nga motampo pagpamenus sa hinungdan aning mga baradong agianan sa tubig.
Angay baya gyud unta nga ang mga kapitan ug barangay officials magumol gyud og task force o opisina gyud diha sa barangay nga tahasan nga moatiman sa tanang mga kanal ug mga sapa diha sa ilang hurisdiksyon.
Apil niini ang pagbantay ug pagpahamtang og silot batok sa mga tawong masakpang magpataka og labay og basura sa palibot ilabi na sa mga agianan sa tubig.
Naa man gyuy mga ordinansa ug balaod batok niini, apan kuwang gyud kaayo sa implimentasyon ang mga barangay officials.
Sa local government units, ang mga barangay maoy kinauyokan o nucleus sa panggobiyerno kay sila maoy naa sa kinasentrohan sa populasyon.
Apan kun ang mga opisyales magmika ug magdawat lang og sweldo inay motrabaho para sa kaayohan sa ilang dapit, maproblema gyud ang tanang ang-ang sa panggobiyerno gikan sa mga mayor hangtud sa nasudnong kagamhanan.
Mas makita pa sila kanunay kun panahon sa kampanya o ba kaha sa mga tigbakay o mga kalingawan sa barangay nungka sa aktwal nga panerbisyo.
Kuwang sa inisyatiba ang mga nanglingkod karon nga mga barangay officials diin makita kining mga baradong mga sapa ug mga kanal.
Wala sila kahibalo kun unsay buhaton ug nahimo na hinuon silang kabahin sa problema inay solusyon.