Posible bang P20/kilo?

Human sa iniphanay sa mga balota, diin midaug si President-elect Bongbong Marcos (PBBM), unang adlaw pa lang, miputakputak na among silingan nga diehard Leni supporters. Hain na kuno ang P20 per kilong bugas nga gisaad ni PBBM?

Hasta ang tabiang AM radio station, puwerting sulsol. Asa kunong tindahanang namaligyag tag P20 ang kilo sa bugas? Kay magpanon silag pamalit. Pastilan, pagka-alingugngog paminawon!

Wala pa gani moabot ang adlaw sa official counting of ballots sa Kongreso, silang wala mobotar ni PBBM, naningil na?

Naghilomhilom ra man gani ang 31 milyones kapin nga dumadapig ni PBBM, kinsa misalig nga tumanon gyod ni PBBM ang iyang gisaad. Dili lang madiha-diha. It takes time.

Green revolution, nga kanhi kinanindotang proyekto sa iyang amahan, Presidente Ferdinand E. Marcos (FEM), gusto niyang banhawon. Gani, wala pa siyang makasugod paglingkod sa Malakanyang, nakighinabi na siya sa mga eksperto sa Japan bahin sa mga modernong teknolohiya sa agrikultura. Diin, ang Japan mipakita sa ilang kaandam motabang.

Nabulahan atong nasud sa maong green revolution ni FEM. Tungod sa kaabunda sa humay, kita ang namaligyag tinoniladang bugas sa gawas. Dili sama sa panahon ni Cory Aquino ngadto na sa iyang anak nga si PNoy ug hangtod karon, diin atong gobiyerno mao nay sigeg pamalit sa gawas.

Imbes maoy paliton ang kaugalingong ani sa pobre tang mag-uuma, ang Department of Agriculture nagpunay hinuog import og bugas aron makagastog dako atong kagamhanan. Ug kon paliton man ang kaugalingon tang produkto, sa presyo nga makaalkanse kaayo.

Mao baya kini hinungdan nganong pipila kanila, marijuana nay gitanom sa ilang uma. Kay kusog ang demand, unya mahal pa!

Sa laktod, daghang luna sa Pilipinas ang wala na katamnig humay.

Busa, kon pahugtan ni PBBM ang pagpatuman sa green revolution project sa tibuok Pilipinas inabagan sa Senado, kinsa maoy tigpanday og balaod nga mosuporta niini, ang mga nangaupaw tang kaumahan, mo-green na usab. Abunda na unya kita sa bugas. Diin, tungod sa kaabunda sa suplay, ang presyo mous-os. P20/kilo? Basin, mominus pa!

Hinuon, matinuod lang kini kon usag-usa nato, labi na kadtong pirmeng tigkontra sa bag-ong adminsitrasiyon, magkahiusa pagtinabangay pinaagi sa pagpananom mismo og liso sa gugma sulod sa atong kasingkasing.