^

Banat Opinyon

Giunsa pagkab-ot ang P31 nga umento sa suholan?

LINTUNGANAY - Fred P. Languido - Banat

Angayang pasabton sa Regional Tripartite Wages and Productivity Board (RTWPB) ang publiko giunsa nila pagkab-ot ang P31 nga kantidad sa umento sa suholan matag-adlaw dinhi sa Central Visayas.

Unsay mga konsiderasyon nga ilang gilakip sa sumada aron maabot ang naasoy'ng kantidad.

Sama pananglit sa pagtandi sa presyo sa mga nag-unang palaliton dinhi sa rehiyon ug sa ubang dapit. Importante ni nga apil sa ikonsiderar tungod kay salikwaot nga mas dako pa ang sweldo sa gagmay'ng dakbayan kun itandi sa dakbayan sa Sugbo, ang giila nga Queen City of the South.

Ug posible nga mao ni mahitabo sugod karong Hunyo 5 diin ipatuman na ang P55 ug P110 nga umento sa suholan didto sa Western Visayas.

Sigun sa labing awahi nga wage order didto sa Western Visayas mokabat na sa P450 matag-adlaw ang sweldo sa mga trabahante diha sa non-agricultural sector alang sa mga kompaniya nga dunay sobra sa 10 ka mga kawani samtang P420 sab alang niadtong duna lay minus sa 10 ka mga kawani.

Samtang sa agricultural sector P410 na ang ilang i adlaw nga suholan didto.

Dinhi sa Central Visayas, ang atong kasamtangan nga minimum wage sa Metro Cebu alang sa non-agricultural anaa sa P404 matag-adlaw ug P394 usab alang sa agriculture sector.

Kun hingpit mapatuman ang P31 nga umento mahimong P435 ang  minimum nga suholan sa non-agriculture sector sa Metro Cebu samtang P425 usab sa agriculture.

Sa ato pa mas mahal og P15 ang minimum nga suholan sa Western Visayas. Nganong nahitabo man nga mas dako sila og umento kun itandi dinhi sa ato?

Nagpasabot ba ni nga mas maayo ang ekonomiya sa Western Visayas itandi dinhi sa atong rehiyon?

O mas sensitibo lang ang mga sakop sa ilang wage board sa kahimtang sa mga anak sa singot kun itandi dinhi sa ato?

Nakasabot ko nga daghan sa mga negosyante dinhi sa Sugbo ang apektado sa pandemiya. Apan ang ilang nahiaguman nasinati sab sa ubang mga negosyante sa nasud lakip na didto sa Western Visayas.

Ang Trade Union Congress of the Philippines (TUCP) nangayo og P430 nga umento. Dako ra sab ang maong kantidad taliwa sa pandemya, apan ang P31 nga giaprobahan sa wage board dili sab makiangayon.

Angayang pangutan-on sa mga membro sa RTWPB-7 ang ilang kaugalingon paigo ba sa ilang panginahanglan matag-adlaw ang maong kantidad.

Way epekto nga mabatyagan ang mga mamumuo sa maong umento labi pa nga dili pa lang dugay giaprobahan sa Department of Trade and Industry (DTI) ang 10 porsiento nga usbaw sa presyo sa mga nag-unang palaliton.

CENTRAL VISAYAS

Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with