Kon wa pa ang bagyong Odette, tingali nahuman na ang Lusaran-Lahug Bulk Water Project nga mao ang pagsuplay og tubig sa MCWD sa mga lumolupyo sa kabukiran dinhi sa Cebu City.
Unsaon nga nalangan man ang proyekto tungod sa pag-igo sa bagyo kay nahunong man ang trabaho. Ang mga trabahador nag-ayo sa ilang kabalayan nga nangaguba sa bagyo.
Kini maoy rason nga mora’g nalangay ang proyekto ug bali’g duha ka buwan, ug gibana-bana nga ang proyekto adto na mahuman sa buwan sa Agosto.
Matud ni Atty. Joey Daluz III, ang chairman sa MCWD, nga gipaspasan karon sa ilang kontraktor ang pagladlad og mga dagkong tubo sa tubig gikan sa Lusaran paingon sa Barangay Busay.
Dugay gyud mahuman ang proyekto kay 25 kilometros ang gilay-on gikan sa Lusaran paingon sa Barangay Busay nga maoy ladlaran og mga dagkong tubo sa tubig.
Ang gidak-on sa tubo nga puthaw, masulod ang usa ka bata. Gikan sa 2.8 ektarya nga pond nga gihimo didto sa Lusaran nga maoy pundohan sa tubig, ibuga ang 20,000 cubic meters nga tubig kada adlaw paingon sa Busay.
Isulod kini sa duha ka dagko kaayong mga tangke ug dayon, ipaagas na lang ngadto sa mga linya sa kabalayan sa bukid sama sa Busay, Apas, Banilad, Lahug.
Ang mga barangay nga maagian sa mga tubo sa tubig gikan sa Lusaran paingon sa Busay, makabenepisyo sab gihapon. Huwat-huwat lang ta, ug kanunay’ng sunda ang atong lindog sa Banat News kay aron masayod dayon kamo sa mga kalamboan.
* * *
Husto gyud bitaw si LTO-7 Regional Director Vic Caindec nga maisip nga dunay sayop ang mga motorcycle dealer nganong dugay kaayo ang ilang pagparehistro sa pinalit nga motor.
Ang tukma unta nga himoon sa mga dealer mao nga kon may mopalit og motor, ilabi na kon cash ang pagbayad, dad-on dayon nila sa LTO aron iparehistro.
Apan unsay sagad himoon sa mga dealer? Ila usa nga padaghanon, tingubon ang pagrehistro. Suheto ko niini kay karong bag-o duha tulo ka bag-ong motor ang akong akong gipalit.
Giingnan ko nga unom ka buwan, dunay miingon nga tulo, ug duna sa’y miingon nga duha ka buwan. Ang mga sales manager nga akong gikaestorya, akong gikataw-an.
Gisabot nako nga kuhaon ra nako ang mga original nga papeles sa motor, ug ako ra ang magparehistro. Aw tuod, usa ra ka adlaw, rehistro dayon.
Matud ni Director Caindec nga ang sayop sa mga dealer kay anhi dinhi mamaligya, apan ang uban adto iparehistro sa Mindanao, adto sa Luzon, aw madugay gyud.
Ang uban sab, huwaton nila nga modaghan ang halin usa nila dad-on sa LTO.