MAYO 1, 2022: Ikatulong Domingo sa Pasko sa pagkabanhaw
Mga Pagbasa: Buh. 5;27-32, 40b-41/Sal. 30/Gip. 5;11-14/Jn. 21;1-19
Duna toy magtiayon nga niduol nako. Ang hinungdan mao nga dunay usa kanila nga nasipyat sa ilang kaminyoon. Daw sa gihiwa ang akong kasingkasing sa dihang nakita ko ang babaye nga nitibi tungod sa binuhatan sa iyang bana ngadto kaniya.
Apan tungod sa dakong gugma niya sa iyang bana ug sa iyang mga anak iyang giluom ang tanan. Suko kaayo siya. Ang bana sa laing bahin, padayon nga nangayo og pasaylo ug nanaad nga dili na gyud magpakasala pag-usab sa ilang kaminyoon.
Gihigugma mo ba ako? Pangutana ni Jesus ngadto sa iyang sinaligan nga si Simon Pedro. Ang tawo nga giisip nga bato apan nilimod sa iyang magtutudlo sa makatulong higayon. Ang tawo nga sa dihang nakita tingali niya ang kapakyasan sa misyon mao nga buot na lamang mobalik siya sa iyang naandang panginabuhi nga mao ang pagpanagat og isda inay ang pagpanagat og mga tawo.
Ang tawo nga gipahinumdoman sa iyang bili ug padulngan sa dihang ang managsamang hitabo kun scenario sa dihang siya unang gitawag ug ning ikaduhang higayon siya gipahimangnoan sa iyang sense of purpose nga mao ang pagpanagat og mga tawo ug dili ang pagpanagat og mga isda.
Adunay mas suod nga kukabildo nga nahitabo tali kang Jesus ug kang Simon Pedro. Ang pangutana nga gibungat sa makatulo: “Gihigugma mo ba ako?”Bisan pa man kun affirmative ang mga tubag ni Pedro apan sa iyang kahiladman nahinumdom siya sa iyang dakong kasaypanan.
Apan si Jesus nga iyang Magtutudlo padayong niingon: “Atimana ang akong mga Karnero!” Timailhan kini nga sa gihapon nisalig siya kang Pedro.
Sa atong panaw sa kinabuhi adunay mga higayon nga kita mahilukapa. Ang Dios kanato padayong nahigugma kita ba usab nahigugma pa ba kaha kaniya? Ug ang pulong dili paigo kinahanglang ang buhat nato maoy mosulti…..mentras tanto, maayong piyesta taga Madridejos, Alegria! Viva San Jose! Viva!