Pag-ayo sa tarong nga kadalanan

Wa ug tuo ang mga proyekto nga gipatuman sa Department of Public Works and Highways (DPWH) pinaagi sa district engineering office niini dinhi sa dakbayan niining pipila ka mga adlaw sa dili pa ang eleksiyon karong Mayo 9.

Kun nakamatikod mo hapit tanang karsada sa dakbayan ilang giayo. Usa na niini ang V. Rama Avenue.

Sigun sa pahibawo sa DPWH, sanglit gimando man sa balaod nga kinahanglan nilang ibutang pinaagi sa usa ka billboard ang mahinungdanong kasayuran mahitungod sa proyekto sama sa kantidad niini, unsay gidugayon sa trabaho, kinsay kontraktor ug uban pa, kapin sa P38 milyones ang gahin sa maong proyekto.

Ambot og angayan ba nga malipay ang publiko sa maong proyekto?

Matag-adlaw ko nga moagi sa V. Rama Avenue busa nasayod ko nga labihan pa ka hamis sa maong karsada.

Nahibulong nalang ko nga usa ka gabii samtang nagmaneho ko pauli gikan sa trabaho dihay mga trabahante nga nagkalkal sa karsada.

Ilang giguba ang maayo pa nga karsada aron ayuhon og balik. Dili nalang ko mangutana duna bay exemption gikan sa Comelec ban ang pagpatuman sa maong proyekto tungod kay dili ni maoy mahinungdanon.

Ang importanteng pangutana nga angayang tubagon sa DPWH ug sa ubang hingtungdang opisyal mao: Nganong giusikan ang dakong kantidad sa kwarta sa mga magbubuhis pagpaayo sa mga karsada nga dili pa angayang ayuhon?

Dunay mga proyekto  nga mas angayang gastohan sa kwarta nga ilang giusikan.

Dili ko enghenyero apan bisan sa mata mata nga kwentada mura og labihan ra ka mahal sa  P38 milyones nga gahin sa pagpaayo sa pila lang ka bahin sa V. Rama.

Labi pa gyud nga imong maobserbahan ang ka nipis sa aspalto nga gibubo diha sa karsada.

Hinaut tugkan og konsensiya ug kaikog sa mga kabus nga magbubuhis ang mga nagpasiugda niining mga proyekto pagpaayo sa mga tarong pa nga mga karsada dili lang dinhi sa dakbayan sa Sugbo.