^

Banat Opinyon

Pasiyon ni Hesukristo

JAV BANATI - Javier Yntig Tapulado - Banat

Tungod sa pandemiya, daghan ang nawala nako. Trabaho, suweldo, mga kauban ug higala sa trabaho. Ang pait, kay hasta ang dumdumonon kong Siete Palabras didto sa mga pribadong balay, diin usa ako sa mga mamumulong, nawagtang sab.

Kahaw-ang sa dughan akong nasinati. Lalim bay, tin-edyer pa kong nagpunay’g apil ning maong tulumanon, unya tungod ra ni COVID-19, kini naputol?

Kuan man god, akong namatikdan, nga kada human nakog batbat sa giasayin ngari nakong Pulong sa Siete Palabras, ingon sa mogaan ang kinatibuk-an nakong lawas, daw molutaw sa hangin akong kaugalingon ug morag gigakos ko sa dili masabot nga matang sa usa ka talagsaong pagbati. Tingale, tungod kay duyog sa akong pagpamalandong-batbat, kinasingkasing kong gihinulsulan ang tanan kong sala.  Ikatulong tuig na karon nga nahunong ko ning maong balaanong tulomanon. Ug dili tuyoon, mingawon gyod ko niini. Busa, dihang ang among grupo sa Lectors and Cantor, usa sa mga giawhag-sugo sa pari nga i-dramatize ang Pasiyon ni Hesukristo sa miaging Palm Sunday, puwerte nakong lipaya. Pero gisukod sa Ginoo akong pailob. Sa among praktis, akoy gipunayag badlong sa pari. Matud niya: Ayaw usba ang script! Apan wala kini makatandog sa akong pagkamasinaboton.

Gisulod ko sa ulo ang unsay gusto niyang ipasunod nga tuno base sa script nga among gitamdan. Adlib? Bawal!

Sanglit, siya man ang among direktor ug kami, sumusunod lamang, aw, siyempre, matuman ang iyang pagbuot. Follow the leader.

Tuod man, nagmalampuson kami sa maong gi-dramatized nga Pasiyon ni Hesukristo sa miaging Palm Sunday nga misa. Gani, may parokyanong miduol-sulti nako, nga maayo kuno ang pagkahan-ay-batbat sa nahisgotang taas kaayong ebangheliyo.

Dinhi akong nasabtan ang mensahe sa Ginoo nga nakalipay nako. Nahunong man tuod akong tulumanong Siete Palabras didto sa pribadong balay matag Biyernes Santo, pero gipulihan Niya kinig ebangheliyo sa Pasiyon ni Hesukristo sulod sa dakong simbahan.

Diin, dili lang gamayng pundok sa mga magtutuo sa pribadong balay ang mitambong. Kondili, dakong panon sa nanimbahay ang nakadungog sa among pagsangyaw sa mga pulong sa Diyos nga nahipatik sa mga panid sa ebangheliyo nga misaysay bahin sa Pasiyon ni Hesukristo, diin kini daw punyal nga miduslak sa akong kasingkasing, mipahinulsul sa akong pagka masalaypon.

COVID-19

Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with