Usa ka trak nga kwarta

Ang usa ka milyon ka pesos sa tag-P1,000 nga papel de banko, hapit usa ka dangaw ang gibag-on niana. Pero kon bag-o pa gani nga kwarta, dili makaabot og usa ka dangaw ang P1 million.

Sa ato pa, kay 1,000 man ka P1 million ang P1 billion, mga usa ka sako nga kwartang tag-usa ka libo ka pesos ang usa ka bilyon ka pesos.

Matud sa balita, ang banay ni kanhi senador Bongbong Marcos adunay bayranan nga buhis (Estate Tax) ngadto sa Bureau of Internal Revenue nga P203 billion.

Nagpasabot kini nga usa ka 10-wheeler truck nga kwartang pulos tag P1,000 ang katumbas sa obligasyon nilang Bongbong nga bayranan nila ngadto sa kagamhanan nga wa pa bayari.

Kita nga mga ordinaryong tawo, mahadlok nga ikiha sa BIR kon dili makabayad sa atong buhis, ug mao nga ang atong sweldo giibanan daan og withholding tax sa atong employers.

Ang mga dunay ginagmay nga panginabuhi, obligado gyud nga mobayad og buhis. Gani, ako lang, nag-hire gyud ko og bookkeeper sa gamay nakong negosyo nga maoy mohikay sa akong mga dukomento ug mobayad sa akong buhis sa BIR.

Mao nga sakitan ko nga maghunahuna nga si Bongbong Marcos nga maoy administrator sa ilang katigayonan nga bahin sa namatay niyang amahan, dili mobayad og Estate Tax.

Kini maoy rason nga nakaingon ko nga dili gyud siya angay’ng himoong presidente. Tarong ba gud nga ang himoon natong presidente mao ang tawo nga dili motuman sa balaod?

Kita nagbayad ta og buhis sa ginagmay nato nga sweldo, apan diay usa ka trak nga tag-usa ka libo ka pesos, gilingiw-lingiwan ra ni Bongbong.

Unya, kusog kuno si Bongbong sa mga survey. Kon tinuod man kini, ang rason kay ang mga tawo wa makasabot nga ang usa ka maayong presidente ang matinumanon sa balaod.

Si Vice President Leni Robredo, maayo man pud kay abogado, apan nahadlok lang ko kay suod man gud niya ang mga walhon.

Pananglit modaog si Leni pagka presidente, mosiaw na sab ang mga walhon ug basin hatagan pa niya’g pwesto sa kagamhanan.

Mao nga sa yano nako nga pagsabot, mas bentaha pa si Isko Moreno kay kaliwat og Sugboanon ug way isyu, unya maayo’g binuhatan sa iyang pagka mayor sa Manila.

Si Inday Sara Duterte gyud unta ang angay, apan wa man siya modagan pagka presidente. Si Lacson maayo sab, apan ang problema kay hinay kaayo sa mga botante.

Naa man tuod si Senador Manny Pacquiao apan dili sab masaligan nga modumala sa nasud. Mao nga tan-aw nako, maayong si Isko Moreno na lang gyud.