Kadudahang lihok sa Comelec

Kon unsa ang gidili sa Konstitusiyon, gibuhat sa Commission on Election (Comelec). Sama pananglit sa pagpakigkontrata niini ngadto sa Rappler, nga gipanag-iyag usa ka langyaw nga maoy momonitor sa kalihokan sa eleksiyon. Diin, dili gyod angay!

Niining bag-o, milutaw sa imbestigasiyon sa Senado, nga ang pag-imprinta sa mga balota alang sa piniliay, hilom nga gisugdan. Unya, walay mga witness gikan sa nagkalainlaing partido nga dapat nakatutok sa maong pagpangandam.

Matud pa, 66.4% na ang naimprinta. Ang kabahing 42% niini, giimpaki ug igpapadala na ngadto sa nagkalainlaing dapit nga puntariyahan niini.

Wala kini ikahimuot ni Senador Imee Marcos, kinsa maoy nangulo sa imbestigasiyon. Tungod kay 33.6% na lang ang nahabiling imprintahonon ug gawas nga ulahi na, gamay na lang kaayo ang mabantayan sa mga witness.

Hinuon, nangatarongan ang taga-Comelec, nga tungod kuno sa pandemiya, diin naa pa ang pagtinakdanay sa COVID-19 ug delikadong mabiktima ilang mga empleyado ug ang mga mo-witness, maoy hinungdan nga temporariyo nila kining wala pasudla.

Apan bisan pag unsay irason sa Comelec, dili na matakpan ang nabuhat nilang sipyat. Sipyat nga naghatag sa katawhan og dakong pagduda nga diha sulod sa Comelec, adunay hokus pokus ug daghang madyik nga makagubag samot sa imahe sa Comelec nga guba na daan.

Ang proseso sa pag-imprinta og mga balota adunay Standard Operations Procedures nga hingpit tumanon.

Buwahan, dili makalusot ang pagpanikas. Oras nga dili kini sundon, dakong posibilidad nga sa hilom, aduna nay nalutong tikas.

Mga Overseas Filipino Workers, kinsa dugay nang wala magparehistro, nagyawyaw. Kay karon hinuon nga nagparehistro na sila aron botohan ang tukmang kandidato nga seryosong mopadayon sa ibiling mga maayong programa ug proyekto ni Presidente Duterte, daw natimahoan nilang tikason ra diay gihapon kini sa Comelec?

Pastilan, kaanugon kuno sa ilang boto nga dili mahipunta sa tinuorayng kandidatong gipili? Sila misugyot, nga mas maayo pang ibalik sa manomano ang iniphanay sa resulta ug pabantayan pag-ayo sa masig ka dumadapig ang iniphanay gikan sa mga presinto hangtod na sa paghatod sa mga balota ngadto sa Comelec.

Ang mga OFW nawad-an nag pagsalig sa Comelec. Ug kinsa pa bay mosalig ning gipakita nilang lihok nga makahatag gyod og dakong pagduda tinuoray?