Dear Atty. Divine,
Ang akong anak natawo last year apan hangtud karon wa pa gihapon kini Birth Certificate. Adunay gihatag nga Certificate of Live Birth ang hospital apan wa kini nako ma-submit sa Local Civil Registrar kay naghuwat ko nga mouli ang iyang amahan nga nagtrabaho abroad. Apan tungod sa Covid-19 wa makauli ang amahan sa akong anak.
Ang gusto man gud niya nga ang iyang apelyido ang gamiton sa bata apan kinahanglan man siyang mopirma sa Certificate of Live Birth kay dili man mi kasal. Ang akong pangutana, kun akong i-submit karon ang Certificate of Live Birth sa bata aron marehistro na siya, mamahimo bang usbon ang iyang apelyido kun makauli na ang iyang amahan og makapirma na sa Affidavit of Acknowledgment? Daghang salamat.
Elsa
* * *
Dear Elsa,
Yes, bisan kun imo nang irehistro ang bata sa Local Civil Registrar, mamahimo gihapon siyang mogamit sa apelyido sa iyang amahan kun maka-submit na ang amahan sa bata og Affidavit of Acknowledgment of Paternity ngadto sa Local Civil Registrar.
Busa kun wa pay klaro kun kanus-a makauli ang papa sa bata, mamahimo nga imo nang i-submit sa Local Civil Registrar ang iyang birth certificate ug inyo lang unyang i-submit ang Affidavit of Acknowledgment sa amahan ug ipa annotate sa birth certificate sa bata aron mamahimo na siyang mogamit unya sa apelyido sa iyang papa. Thank you and God Bless.
Atty. Divine
* * *
Alang sa inyong pangutana, palihug lang sa pag-email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.