_banat
^

Banat Opinyon

May alisbo na sa malisya

ARANGKADA - Banat

Haskang paita. Kapin sa duha ka tuig na ang pandemiya pero wa pa gihapon magkadimao ang Department of Health (DOH) sa pag-ihap sa mga nangamatay ug sa mga nangaayo sa COVID-19. Maong may sukaranan ang pagduda sa kamatinud-anon sa ilang pag-ihap sa kinatibuk-an nga mga kaso.

Sa inadlaw nilang bulletin kada alas-4 sa hapon maapil gyod ang kinaham nilang palusot: “Di angayng ika-alarma ang gidaghanon sa nangamatay kay kasagaran nila nakalas sa nangagi pa nga mga buwan.” Ug ang kinaham nilang rason sa kalangay: Nauwahi pag-encode sa database sa CovidKaya.

* * *

Sa ilang bulletin niadtong Huwebes, Enero 13, giangkon sa DOH nga apil sa 82 ka patay nga ilang gitaho mao ang duha nga naghubkas na–namatay niadtong Enero 2021 pero napahibawo sa publiko karon pang Enero 2022. Sama sa naandan, wa magtagad ang DOH sa pagpasabot nganong naabtan og tuig ang kalangay sa encoding.

Mayoriya ang nangamatay sa niaging tuig: Duha sa Marso; pito sa Abril; usa sa Mayo; duha sa Hunyo; upat sa Agosto; 13 sa Septiyembre; unom sa Oktubre; duha sa Nobyembre; ug lima sa Disyembre.

* * *

May mga naghubkas na sab sa 144 ka nangamatay sa COVID-19 nga gitaho sa DOH sa ilang bulletin niadtong Miyerkules, Enero 12. Duha ang namatay niadtong Enero 2021.

Apil sa mayoriya nga nangamatay sa niaging tuig: Lima sa Pebrero; 16 sa Marso; 38 sa Abril; 13 sa Mayo; tulo sa Hunyo; walo sa Hulyo; 22 sa Agosto; ug walo sa Septiyembre.

* * *

Laing makapahibung nga hangtod karon wa ikapasabot sa DOH: Samtang kanunay nga nagkuwang ang ilang ihap sa mga nangamatay, kanunay sab nga nagsobra ang ilang ihap sa mga nangaayo sa COVID-19. Mora og di na ni tungod sa duka. Pasayloa ang among kamadudahon. Pero duna na ni gamay nga alisbo sa malisya.

Pananglitan, sa ilang bulletin niadtong Biyernes, Enero 7, giangkon sa DOH nga ilang gitangtang gikan sa lista sa kinatibuk-an nga mga kaso sa COVID-19 ang 51 ka recoveries nga nadoble nila sa pag-encode. Sa samang bulletin, nikumpisal ang DOH nga dunay 111 ka pasyente nga ilang giila nga recoveries pero sa dugang pakisusi napamatud-an nga nangamatay diay.

* * *

[email protected]

DEPARTMENT OF HEALTH
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with