Nangilkil ba ang linemen

Wala makabot sa Visayan Electric Company (VECO) ang ilang target nga mapabalik nila sa pagpasiga ang nasulod sa ilang franchise area nga gipawong ni bagyong Odette. Gipasalig sa VECO nga ilang paningkamotan nga 100% nilang mapasiga ang nasulod sa ilang franchise area sa dili pa mapopos ang tuig 2021. Apan hapit na lang mgtunga-tunga ang buwan sa Enero ning tuig 2022  aduna pa gihapon mga dapit nga sulod sa franchise area sa VECO ang wala pa nila mapasiga.

Nagpat-ak-pat-ak ang mga dapit nga ilang napasiga. May mga dapit nga nagbuyon ug nagtupad ra apan adunay wala magsiga. Tungod niini, mitumaw ang mga pasangil nga nangayo ang mga linemen sa VECO ug lima ngadto sa napulo ka libo ka pesos (P5,000.00-P10,000.00) aron mapadali ang pagpasiga sa suga sa mga mobayad. Gipanghimakak kini sa VECO. Ang kapolisan miawhag sa mga tawo nga nagreklamo sa pagdangop sa ilang buhatan aron ila kining mahatagan og tukmang lakang.

Sigun sa akong nahibawan, ang mga tawo sa dapit nga napasigaan sa VECO nalipay. Tungod sa ilang kalipay, nagtampo-tampo sila og pang merienda o pang snacks sa linemen sa VECO nga nagtrabaho aron mapasiga na ang ilang dapit. Wala mangayo og salapi ang linemen sa VECO. Ang mga tawo ang miboluntaryo sa pagtunol kanila og pang merienda ug kini gihatag human sila nagtrabaho. Lahi na nga istorya kun ang mga tawo mihatag og salapi sa linemen sa VECO aron mapasiga ang ilang dapit. Samot na gyod kun ang mga linemen sa VECO nangayo og salapi sa mga tawo aron mahatagan og kahayag ang ilang dapit. Pangilkil na kini. Kaso kining kriminal.

Ang paghatag og pang merienda o pang snacks sa linemen sa VECO human sa ilang trabaho, gitawag kini og pahalipay. Apan ang paghatag og pang merienda o pang snacks sa wala pa sila magtrabaho gitawag kini og suborno. Samtang ang pagpangayo sa linemen sa VECO og pang merienda o pang snacks sa dili pa sila motrabaho, gitawag kini og pangilkil.

Asa man aning tulo ang gihimo sa linemen sa VECO? Midawat ba sila og pahalipay o suborno o nangilkil?