Hunahuna nga nagsuroysuroy

Nag-atubang sa laptop nga naghinuktok, nanampiling, mitutok sa akong hulagway nga naka-frame sa opisina sa barangay, mihangad sa kisame, nagpiyong-piyong hangtod nga nakatulog, wala gyod naporma sa akong utok ang akong suwaton para sa akong lindog karong adlawa. Ambot lang! Ngano kaha?

Nakamata nalang ko human nga nakatulog nga naglingkod nga nag-atubang sa akong laptop, mao ra gihapon wala gihapon koy nahuna-hunaan nga suwaton aron inyong mabasa ning adlawa. Maayo  unta kon sa akong pagkatagpilaw akong gidamgo ang akong suwaton pero wa gyod gihapon.

Sa akong paghinuktok ang akong hunahuna nagsuroysuroy og daghan ko og nasugatan nga akong nahunahunaan nga suwaton. Apan wala pod ko makauyon niini sama sa pagpahibawo ni Presidente Rodrigo Roa Duterte nga dili na siya modayon sa pagpapili pagkabise presidente sa nasud ug ang iyang pagretiro sa politika human sa iyang termino, pagduso ni Senador Bong Go sa iyang certificate of candidacy pagkabise presidente sa nasud niadtong Sabado kuyog si Presidente Duterte.

Nasugatan pod sa akong hunahuna nga nagsuroysuroy ang posibleng panag-uban sa umaabot piniliay nila ni kanhi Senador Bongbong Marcos pagkapresidente ug Mayor Sara Duterte isip iyang bise presidente. Ang resulta sa survey sa Pulse Asia sa buwan sa Septyembre diin gipildi ni Senate President Vicente “Tito” Sotto III si Presidente Rodrigo Roa Duterte sa pagkabise presidente sa nasud.

Nasugatan pud sa nagsuroysuroy nakong hunahuna ang pito pa lang ka buwan nga puya nga namatay human gisulod sa iyang inahan sa karton ug giputos sa karsones ug gipaanod sa Irrigation sa Sitio Kabulihan, Sta. Ana, Barili niadtong Domingo sa buntag. Pagka wa gyod tawon puangod sa inahan nga nakahimo sa paglabay sa iyang anak. Maayo lang siya mopapiyongpiyong ug nagpaluratluratsa iyang mata sa paghimo nila sa bata pero sa dihang naporma na gilabay ra diay nila. Wala ko ganahi nga suwaton kining mga nasugatan sa akong hunahuna nga nagsuroysuroy maong kamo nalang bahala niini.