Sayri ang katawhan

Gipahibawo ni Cebu City Administrator Floro Casas Jr. Nga mibalik na si Cebu City Mayor Edgardo Labella sa iyang trabaho dungan gihapon sa pagpakita sa hulagway sa mayor.

Sa nangaging mga pag-leave sa mayor sa iyang trabaho ug pagbalik niini wala gayod kita makakita personal kini nga mibalik sa City Hall. Igo lang gipahibawo ni Atty. Casas ang katawhan sa Sugbo nga nag- work from home ang mayor dungan sa pagpakita sa hulagway sa mayor.

Apan ang mga igmat og mata ug mga himantayon dali kaayong nakabantay sa hulagway sa mayor nga nagkupot og pamantalaan diin matud pa nila klaro ug milutaw nga gi-photo edit ra kini diin gipalutaw nga ang hulagway ni Mayor Labella nga nagbasa og pamantaan mora’g tinuod bisan og dili. Buot ipasabot nga ang hulagway sa mayor gibutangan lang og pamantalaan nga bagong gawas aron ingnon nga bagong kuha.

Sa laing leave sa mayor may nagduda na sa tinuod niyang kahimtang hinungdan nga gipagawas ni Atty. Casas ang hulagway nga nagpakita ang mayor sa City Hall dungan sa pagpakita sa hulagway sa mayor nga gihimamat sa City Administrator ug mga kaubanan. Sa hulagway wala mokanaug sa iyang sakyanan si Labella.

Ang mga himantayon nga igmat og mga mata dali ra’ng nakabantay nga ang hulagway nga gipakita ni Casas daan na nga hulagway.

Sa pagkatinuod daghan na ang nabalaka ug nagduda sa tinuod nga panglawas sa mayor. Bisan unsa nalang ang atong madunggan nga dili maayong balita mahitungod sa atong mayor sa dakbayan sa Sugbo.

Isip ordinaryong molupyo dinhi sa Sugbo ug kumpare sa mayor, akong isugyot nga personal siyang mopakita sa City Hall bisan kadali lang aron maundang na ang pagduda sa ubang mga tawo nga gusto gayod siyang makit-an. Kun dili niya kini mahimo, puwede ra pod siyang magpatawag og virtual nga press conference nga sa akong tan-aw makapahunong na sa mga pagduda sa tinuod nga kahimtang sa iyang panglawas.