Tupad sa among balay, ang mga namuyo sa usa ka panimalay, pulos na senior citizen (SC): ang magtiayong walay anak ug ang igsoong babaye sa asawa nga dalagang gulang. Matag usa kanila aduna nay sakit.
Wala silay katabang. Sila mismo ang molihok alang sa mga inadlaw nilang bulohaton ug kinahanglanon. Kon sila may lakton sa gawas, hinay na ilang mga lakang.
Ingon niini ang kalbaryo nga ilang gipas-an kada adlaw diha sa ilang pagpanglimbasog aron mabuhi taliwala ning makalilisang pandemiya nga atong giatubang karon.
Gani, dako man ilang tinguha nga sila mabakunahan aron mahataga’g proteksiyon ang guyko na nilang panglawas batok sa COVID-19 nga mimugna na pod og laing mas kuyaw pang kagaw – ang Delta variant.
Busa, dihang ilang nabalitaan nga mipahigayon ang siyudad sa Sugbo og pagpamakuna sa Johnson and Johnson vaccines alang sa mga SC didto sa duha ka dapit: New Normal Oasis for Adaptation and a Home (Noah) Complex, South Road Properties ug SM Seaside City, miadto gilayon ang magsuong babaye aron mopahimulos sa maong libreng tanyag. Ang bana wala na mokuyog kay una nang na-fully vaccinated.
Pero, subo palandungon kay matod pa, pag-abot nila didto sa Noah, grabe na kataas ang linya, unya init pa gyod kaayo ang panahon.
Ug ambot, unsa ka tinuod ang istorya, nga milungtad kunog duha o tulo ka oras ilang hinuwat, wala pa man gihapon matawag ilang ngalan? Hinungdan, nakahukom na lang silang mouli, bahalag wala mabakunahi.
Kon ugaling tinuod man kining hitaboa, kaaanugon sa kahago sa mga tigulang nga wala mahatagig katumanan ang maayo nilang tumong. Ug kon nasinati kini nila, basin bayag ubay-ubay na pong SC ang nakaeksperensiya og susama niini?
Niining bag-o si Cebu City Acting Mayor Michael Rama nagtinguha nga ang mga SC maoy adtoon sa ilang balay aron didto na bakunahan. Ilabi na kuno, kon ang maong tigulang masakiton na kaayo ug dili na makalakaw o makasugakod pagpunta sa mga vaccine site. Gani, gisugdan na kini sa pagsulay.
Nindot unta, Acting Mayor Rama, kon tanan na lang gyong SC ang bisitahon sa ilaha ug bakunahan. Kay kini, sa ilang sensitibong dughan, makapagaan. Ug labing seguro, dili ka nila makalimtan.