Dapat Errol ma-TKO

Bulan sa Agosto na. Duha ka semana kapin na lang ang paaboton aron masaksihan sa tibuok kalibotan ang gikahinamang away sa duha ka banggiitang boksidor: Emmanuel ‘Manny’ ‘Pacman Pacquiao batok Errol ‘The Truth’ Spence Jr. ibabaw sa ring didto sa T-Mobile Arena, Las Vegas, USA ning nagsingabot Agosto 21.

Walo ka bakos ni Eight-Division World champion Manny ug duha ka bakos sa unified WBC and IBF welterweight champion Errol ang daw nahisama sa dulang Poker ang nakasugal: “All in. The winner takes it all.” 

Sa mga training ni Pacquiao ug Spence nga gipasalida sa You Tube vloggers, makumparar kinsa nila ang mas bug-at ug adunay paspas mga kombinasiyong kinumo, dancing footworks ug dekalidad nga sparring partners, kinsa makatug-an asa nilang Manny ug Errol ang may dakong bentaha? Sagad sa mga na-sparring mate ni Pacman, nakasinati gihapog kakusog sa mga suntok sa Pambansang Kamao.

Gani, dunay nakadagan kay hapit malukapa.

Samtang sa panig ni Spence, nasuko si Keith ‘One Time’ Thurman dihang may mipasalida sa training ni Errol, ug mipasunding ang pagpakigsinukliay niinig mga kumo batok sa gika-sparring, diin si Spence gikaligo’g maayo sa mga suntok sa gikaparang niini.

Si Thurman, sama ni Spence Amerikano usab. Bisag gipilde siya ni Pacman niadtong katapusan nilang engkuwentro, ang iyang kasingkasing naa gihapon ni Spence.

 Busa, dili siya gusto nga malili ang kahuyangan sa iyang gidapigang paisano.

Usab, ang Amerikanong Floyd Mayweather Jr., kinsa nangangkong maoy ilhong Greatest of All Times (GOAT), nabalaka tungod niining pagpakigsangka ni Manny kang Spence, diin kon molampos si Manny, seguradong makapabasura sa pirmeng gipanghambog niyang no loss record.

Busa, puwerting pangita’g paagi ni Floyd aron si Spence gyu'y modaug. Gani nabalita man, nga si Floyd nakigkita sa pinakaalas nga promoter niining Pacquiao-Spence Jr. fight sa ambot, unsay tumong?

Kahinumdoman, may pipila ka nangaging away, diin nahiagom si Manny sa mga kuwestiyonableng desisyon sa judges.

Bisag sa minilyong boxing fans nga misaksi, si Pacquiao ang klarong maoy midaug, pero ang nangabun-og hinuong kaaway ang gideklarar.

Busa, kinahanglang nak-awton gyod ni Manny si Spence ning umaabot nilang away.

Buwahan, mao nay iisa sa referee ang kamot sa tinuoray’ng mananaog.

Go, Pacman. Go for GOAT!