EDITORYAL - Kuwang ang health workers
Nakadugang sa kalisdanan sa mga tinugyanan sa panglawas dinhi sa Sugbu kining kakuwangon sa mga medical health workers karong subling nisaka ang mga kaso sa COVID-19.
Kuwang gyud ang medical personnel sama sa nurses ug medical staff samtang duna say mga nanggawas nga estoryang nagkinahanglan silang magdugang og hospital beds.
Apan ang klaro, dunay paigong gidaghanon sa hospital beds apan kuwang gyud ang tawong makaatiman.
Ang Department of Health Central Visayas nagsige na og rekrut og dugang mga sakop aron duna kini madestino sa nagkalain-laing mga tambalanan.
Apan hain naman diay ang mga healthcare workers karon? Naay daghag healthcare workers apan daw dili na interesado sa pagkakaron sa maong trabaho.
Kay gawas nga peligro ang trabaho karon tungod sa exposure sa COVID-19, gagmay sab kaayo og sweldo.
Gani kadtong mga nagpadayon sa trabaho diha sa mga medical health facilities gagmay ra kaayo og sweldo ug hazard pay nga dili gani makaabot og P100 kada adlaw
Mao kini rason nganong ang uban mas gipili lang una nga manarbaho sa laing propesyon kay mas dako ang sweldo, dili sab kaayo sila expsose sa coronavirus.
Kinahanglang mohimo og aksyon dili lang ang DOH bahin ani,ang mga LGUs mahimong motabang pinaagi sa paghatag og mga insentibo,allowances,ug uban pa sa mga medical health workers.
Siguraduhon sab nga dili sila ma 'overworked' tungod kay sa kahimsog sab sa ilang panglawas nagsalig ang padayon ug epektiibong operasyon sa mga tambalanang nag-atiman dili lang sa mga dunay sakit nga COVID-19 kondili hasta sa ubang masakiton.
- Latest