EDITORYAL - Bawal ang way bakuna?

Ning panahon sa pandemiya daghang mga nagkalain-laing inisyatiba nga gihimo ang nagkadaiyang mga local government units aron mapugngan ang pagdaghan sa mga kaso samtang wala pa makab-ot ang gitawag og herd immunity o ang pagpabakuna sa 70 porsiyento sa populasyon.

Apan dunay mga pamaaging wala mauyoni sa katawhan tungod kay daw wala tun-i og maayo kun unsay implikasyon ug dangatan niini kun kini ipatuman.

Ning bag-o, daghang mikisi-kisi sa executive order nga giluwatan sa Lapu-Lapu City aning dili makasulod sa pribado ug pangpublikong merkado ug ingon man mga groceries ug malls kadtong mga tawong wala mabakunahi batok Covid-19. Maayo ang tumong tungod kay dili ikalimod nga kining mga malls, merkado, supermarkets ug susamang mga establisamento tapukan man gyud sa mga tawo ug haom nga lugar aron magtinakdanay sa coronavirus. Apan ang pangutana, panahon na ba kaha nga mopatuman og susama niini kahigpit nga health measures ang siyudad? Haom kini kun nakab-ot na sa maong siyudad ang gitawag og herd immunity o 70 porsiyento sa ilang populasyon ang nabakunahan na.

Dili ba hinuon kini maoy hinungdan nga daghang manggawas nga mga fake Covid-19 vaccination cards? Dili kini imposible, tungod kay duna man gani fake negative RT-PCR test, fake nga kwarta, ug daghan pang uban, kana pa kaha kang gamay’ng papel?

Di ba hinuon mabutang sa peligro ang publiko kung daghan ang magbaton aning mga pekeng vaccination cards?  Usa pa, ang gobiyerno miingon dili pugsanay ang pagpabakuna. Ang implimentasyon niini magsugod karon pang Agosto 25,2021. Sigurado ba kaha ang maong LGU nga makab-ot na nila ang herd immunity anang adlawa?

Kun mas daghan pa ang wala mabakunahi dili ba kaha maapektahan ang mga negosyo ug kinatibuk-ang ekonomiya sa maong siyudad?

Dili ba gitinguha man unta nga magpadayon ang kinabuhi sa katawhan pinaagi sa pagabli sa ekonomiya samtang mag-anad ang tanan nga naa kining pandemiya.

Mantras layo pa ang maong adlaw, mas maayong siguraduhon nga mapaspasan ang ilang vaccination operation apan kana mag-agad sa suplay sa bakuna gikan sa nasudnong kagamhanan. Kung dili gani maapas, mas maayong i-reserba lang una kini sa hustong panahon aron dili makahasol sa mga tawo.