Inahan sa kadautan

Ang inahan, inahan gyud sa kanunay’ng panabang nga andam ibuhis ang kinabuhi tungod ug alang sa kaluwasan sa anak. Apan aniay makapanglimbawot sa balhibo nga bunahatan sa usa ka inahan ngadto sa kaugalingong mga anak.

Kini ang pagpagamit og shabu sa anak nga duha pa lang ka tuig aron dili mohilak sa ingon dili makadisturbo sa mga adik nga mogamit sa ilang balay nga gihimong drug den.

Mismo ang mga opisyal sa National Bureau of Investigation nga dugay nang naghimo og operasyon pagpanggukod sa mga badlongon sa katilingban, nakugang ug daw dili makatoo sa ilang nasayran.

Bisan kita naman seguro ma-shock, kay sagad sa mahibaw-an nato nga ang mga anak gigamit sa pagpamaligya sa illegal nga drugas isip tighatod ngadto sa mga kliyente sa ilang mga ginikanan o sa grupo nga nalambigit sa illegal nga kalihokan.

Ang mga silingan sa babaye ang nagpakabana ug misumbong sa NBI sa ilang nasayran sa gihimo niini ngadto sa iyang mga anak kay nahibulong ang mga tawo nga haduol sa pamilya nganong kanunay murag bangag ang bata nga dili kuno matulog hinungdan sa kadugayan ilang gipanid-an.

Nasayran nga sa higayon nga mohilak ang bata pagamiton kini sa mama og shabu aron mohilom o paduwaon sa mga paraphernalia isip panghaylo aron dili makadisturbo ilabi na kong naay mga tawo nga nag gamit sa ilang balay.

Gawas niini dunay laing anak nga wala pay tuig ang pangidaron ang babaye kinsa diha ra usab sa sulod sa balay sa higayon nga dunay nagpaaso sa sulod nga makaapil sa paghingos ang masuso.

Kong tinuod man ugaling kini, makapanglingolingo kita og makahinuklog unsa naman lang gyud kadautan ang tawo nganong nahimo kini ngadto sa kaugalingon nilang dugo.

Walay luna sa kapasayloan ang ingon niini nga binuhatan kay labaw pa kini sa kadautan, tampalasan, lampingasan ug unsa pa nga mga paghulagway dili kaigo, makalagot nga makapaligotgot.

Nganong nagpatuga tuga og pagpanganak nga among amongan ra man, dili intawon duwaan ang mga bata kinsa angayan nga panggaon ug mahalon labaw sa tanan.

Na-rescue man sa mga otoridad ang mga bata apan nagpabiling gawasnon ang inahan kay wala diha atol sa rescue operation, manghinaut ko nga mapasakaan og kaso sa ingon malutsan og warrant of arrest aron siya madakpan.

Mahitabo kini kong dunay mga silingan nga moluwat og affidavit aron dunay basehan ang NBI sa pagsang-at sa kaso batok sa inahan nga mihimong adik sa iyang anak dos anyos pa lang.

Angayan lang silotan ang ingon niini nga inahan sa kadautan nga miabuso sa iyang mga inosenting anak nga sayong pangidaron giguba niya ang kinabuhi.