Tukma kaayo ang gisulti ni MCWD Chairman Jose Daluz III nga daghan kaayo’g tinubdan sa tubig ang Sugbo apan wa lang mahimoi og paagi aron kini kapahimuslan.
Apil ko sa mga sakop sa media nga mikuyog sa mga opisyal sa MCWD nga mitungas sa Barangay Tagbao, bukid nga barangay sa Dakbayan sa Sugbo.
Gitan-aw namo didto ang usa ka sapa nga tin-aw kaayo og tubig apan anugon lang kaayo kay direkta ra kini nga modagayday sa dagat ug wa gyud kapahimusli.
Mga 30 kilometros ang Barangay Tagbao gikan dinhi sa dakbayan. Ang mga opisyal sa barangay midili gyud sa katawhan nga molabay ug mga hugaw sa sapa.
Tuod, limpyo ug tin-aw kaayo ang tubig sa sapa. Matud ni Daluz nga mao kini ang pangitaan nila’g paagi nga mahimoan og dam, ug pinaagi sa dagkong tubo, ibuga kini paingon dinhi sa siyudad.
Gawas sa sapa sa Tagbao, gitan-aw usab nila ug gikatakda nga amo na usab nga susihon ang sapa sa Barangay Bonbon, 24 kilometros gikan sa siyudad.
Duna gihapo’y dakong sapa nga tin-aw kaayo’g tubig nga wa gihapon kapahimusli. Ang tubig sa sapa sa Barangay Lusaran, himoan na og pamaagi pipila ka buwan gikan karon aron magamit sa katawhan.
Nakigkontrata na ang MCWD og pribadong kompaniya nga maoy mogama og dam, ug modala sa tubig sa pagahimoon nilang dakong tangke diha sa Barangay Busay.
Anha sa maong dakong tangke nga mokonektar ang MCWD aron paliton ang tubig og ikasuplay kini sa mga konsumidor nga nag-antos sa kanihit og tubig sa dugay na nga katuigan.
* * *
Nalipay ko kay gipasaligan ko ni Atty. Daluz nga dili siya molansar og elective position sa eleksyon karong sunod tuig.
Nabalaka man gud ko nga kon molansar si Daluz, mausik lang unya ang iyang mga paninguha pagsulbad sa problema sa tubig dinhi sa Metro Cebu, ilabi na sa dakbayan.
Nalipay sab ko kay abtik kaayo ang ubang opisyal sa MCWD nga motubag sa panginahanglan sa katawhan, sama ni Engr. Edgar Ortega nga usa sa sinaligan ni Daluz. Unya naa pa sila si Engr. Michael Diola nga nagdumala sa water distribution division, ug moapil pa gyud ang akong amigo nga si Edgar Donoso, ang hepe sa MCWD Finance department.
Pipila ka adlaw gikan karon, gusto nako nga mahimamat ang ubang opisyal sa MCWD, ilabi na ang ilang general manager nga si Stephen Yee nga wa pa nako ikakita.
Napanglantawan nako nga karong sunod tuig, dili na kaayo kita maproblema og tubig.