Wala matiwas

Nagbangutan ang katawhang Pilipinhon niining kalit nga pagkamatay ni kanhi presidente Benigno “Noynoy” Aquino III tungod sa renal disease gumikan usab sa gihambin niini nga diabetes. Sa edad nga 61, walay usa nga magdahum sa iyang sayo nga pagpanaw.

Sa iyang pamunoan sulod sa unom ka tuig, dili malalis nga dako ang kabilin ni PNoy sa nasud. Butang nga angay lamang usab natong ikapasigarbo bisan pa man sa grabe nga pagkabahinbahin sa mga Pilipino karon tungod sa politika.

Ilalum sa iyang administrasyon, misulbong pag-ayo ang ekonomiya sa nasud. Sulod sa pipila ka tuig niyang paglingkod sa Malakanyang, nakaangkon ang nasud og economic growth nga mas labaw pa kay sa ubang nasud sa Southeast Asia.

Sa Gross Domestic Product average growth nga 6 percent, nahimong usa sa mga economic shining star ang Pilipinas sa tibuok kalibotan ilalum sa pamunoan ni PNoy. Ang “Sick Man of Asia” niadtong mga dekada 80 ug 90 nahimo na karong “Rising Tiger.”

Hinuon, sa laing bahin, aduna usab akoy kasagmuyo sa administrasyon ni PNoy. Kini kon sa natad sa inprastraktura ang hisgotan diin adunay mga proyekto sa Sugbo nga wala hatagi og dakong atensiyon sa iyang pamunoan.

Kini sama na lamang diha sa Cebu north coastal area, ilabina sa dakbayan sa Mandaue ug mga lungsod sa Consolacion ug Liloan, diin padayon ang grabe nga kahuot sa dagan sa trapiko tungod lagi sa ka gamay sa karsada.

Sa panahon sa administrasyon ni presidente Gloria Arroyo, gisugdan ang dakong proyekto pagpalapad sa North Coastal Road. Gani, adunay dako ug modernong tulay nga gitukod sa Cansaga nga nagdugtong sa Mandaue ug Consolacion.

Apan ang nakaparat mao nga pagpuli sa pamunoan ni PNoy, wala maatiman ang maong proyekto. Ug hangtud karon, bisan pa man niining administrasyon ni Presidente Rodrigo Duterte, wala gayud matiwas ang pagpalad sa North Coastal Road. Ambot kon ngano.