EDITORYAL - Desperasyon sa pagpamakuna

Mibahad si Pres. Rodrigo Duterte sa mga tawong mobalibad sa bakuna batok COVID-19 nga ipadakop ug turokan og Ivermectin nga para sa mananap.

Ang bahad reaksyon kini ni Duterte tungod sa report nga menus ra kaayo ang mga nagpabakuna bisan pa man og daghan ng bakunang nangabot karon sa nasud.

Ang Ivermectin sa mga unang report giingong epektibo kining tambal nga gamiton batok sa COVID-19. Wala hinuon maklaro kun isip bakuna ang paggamit o tambal na gyud sa maong sakit.

Ambot kun seryoso ba kaha ang pangulo sa iyang bahad tungod kay sumpaki man kini sa polisiya sa gobiyerno nga way pugsanay ang pagpabakuna ug boluntaryo lang kini sa gusto.

Tingali parehas lang kini sa iyang mga binugoy nga pamahayag kaniadto nga nakapaukyab sa mga tawo ug ang iyang mga opisyales maoy mopagawas og dugang pagpasabot bahin niini.

Desperado na tingali si Duterte nga mabakunahan ang kadaghanan sa populasyon samtang padayon pa ang pag-abot sa mga donasyong bakuna gikan sa Covax facility sa World Health Organization.

Apan samtang tuod daghan ang nangabot nga mga bakuna, dunay mga lugar sa Pilipinas nga nakasugod na sa pagpamakuna ang pirmeng mahutdan og supply sama na lang dinhi sa Dakbayan sa Sugbu.

Nagkadaghan na ang nagparehistro pinaagi sa online registration, duna pa gyu'y mga 'walk-ins' sa mga vaccination sites ang wala pa nahatagan og bakuna.

Nakatutok ang pagpamakuna hangtud karon sa mga senior citizens (A2), mga tawong may gipamati sa lawas o comorbidity (A3) ug karon ang labing daghan ug padayong nagpaabot mao ang gikan sa A4 category o mga tawong nasakop sa economic sector.

Kung ingon didto sa kaulohan gamay ra ang gustong magpabakuna, mas maayo tingaling ipadala nalang kining mga bakuna sa mga probinsya sama sa Sugbu daghan ang interesadong magpabakuna.

Niining puntoha dili mausik ang bakuna ug mapun-an pa ang mga tawong nabakunahan sa populasyon. Target sa gobiyerno nga mabakunahan ang 70 milyones ngadto sa 100 milyones nga Pilipino sa dili pa mapupos ang termino sa presidente.