EDITORYAL — Ang rebolusyon kaniadto ug sa karon

Saulogon sa Pilipinas ang ika-123rd nga kasumaran sa kaugalingnan niini o Independence Day karong adlawa.

Pagtimaan kini sa adlaw kun diin naangkon sa Pilipinas ang kagawasan gikan sa talikala sa gahum sa mga langyaw.

Dul-an 350 ka tuig nga gigawongan sa mga Katsila ang mga Pilipino, sud nianang mga katuigan silay nikulit sa kapalaran sa mga Pilipino nga nakaimpluwensiya sab sa kun unsa kini karon sa modernong panahon.

Tungod sa edukasyon nakamata ang mga maisog nga mga kabataang Pilipino ug nahitabo ang rebolusyon niadtong 1898.

Ang pag-alsa dili mahitabo kun wala ang edukasyon.  Sa wala pa mahitabo ang rebolusyon, daghang mga Indiyo (tawag sa mga Katsila sa Pilipino kaniadto) ang gipatungha sa mga prayle ug sa gobiyerno sa Espanya.

Ang uban kanila gipadala pa ngadto sa Uropa sama nilang Dr. Jose Rizal, Heneral Antonio Luna, Juan Luna ug daghan pang uban.

Gawas kanila, daghan sab mga Pilipinong nakatungha sa nagkadaiyang mga unibersidad nga gidumala sa kapariang Hesuita ug ubang kongregasyon nga nagtukod og mga kolehiyo ug unibersidad dinhi sa nasud.

Diha sa nagkadaiyang mga institusyon sa edukasyon nakat-on ug nakasabot ang mga Pilipino sa panaugdaog kanila. Sa modernong panahon karon, dunay bag-ong matang sa rebolusyon nga padayong gikombate sa tanan, kini ang rebolusyon batok sa kakabus.

Sama sa panahon sa mga bayani sa Pilipinas, edukasyon lamang usab maoy sigurong hinagiban aron mahaw-as gikan niini.

Mao nga importante kaayo para sa mga ginikanan nga maedukar ang ilang mga anak.  Dinhi sa Pilipinas, katungod sa tanang kabataang Pilipino ang mahatagan og edukasyon hinungdan nga mas daghan ang mga pangpublikong tunghaan itandi sa mga pribado.

Mao sab kini rason kun nganong matag tuig, ang Departamento sa Edukasyon maoy dunay kinadak-ang budget kun itandi sa tanang ahensiya sa gobiyerno.

Gawas sa libreng edukasyon, dunay mga programa ang gobiyerno para sa mga kabus aron masigurong makaeskuyla ang mga anak sa mga kabus nga pamilya sama sa 4Ps, mga scholarship programs ug daghan pang uban. Naa nalang gyud na sa mga ginikanan kun motuo sila nga ang edukasyon para sa ilang mga anak maoy makaluwas kanila.