Naning nga Gwen, ikiha?

Pastilan! Si Cebu Governor Gwen Garcia, kinsa naning kaayo, naningkamot-naninguha taman sa ginhawa nga maalagara’g husto ang mga Sugboanon ning panahon sa pandemiya, giplanohang ikiha kuno sa mga tag-as opisyal sa gobiyerno?

Kahinumdoman nga si Gob. Gwen mihimo’g Executive Order 17 nga makaluag sa kahimtang sa mangunguliayng overseas Filipino workers (OFW) ug returning overseas Filipinos (ROF). Ang maong executive order mipaminus sa minilyong galastohan sa gobiyerno ug sa OFW ug ROF.

Unya, mipamubo usab sa hataas nga mga adlaw diha sa ilang pag-estar sa hotel o quarantine facilities. Sanglit, sa ila pa lang pag-abot, ipa-swab test man dayon.

Ug kon ang resulta ‘negative,’ makauli gilayon. Dili sama sa NIATF, diin ang OFW o ROF, kinahanglang ikuwarentina una og lima ka adlaw sa hotel o ubang pasilidad.

Ug ayha pa sa ikaunom ka adlaw, ipa-swab test. Pagkadako sa deperensiya!

Nganong i-prolong man gyod ninyo, NIATF, ang agony sa mga nanguliayng OFW ug ROF, ning inyong hagukang patakaran nga very expensive and so insensitive?

Dili mga inihap adlaw ray inyong giusikan. Hasta, ilang kita sa gawas nga para sa ilang pamilya, inyo pang gikuhaan. Hain na ba ang inyong kasingkasing?

Ang gihimo ni Garcia dili pagsupak. Gipul-ongan lang niyag diyotay ang naghinobrang sanga sa inyong health protocols aron sama sa tanom, diin human putli sa mga daotang bahin, nanaha’g namungag daghan.

Sa laktod, ang mga lakang nga gihimo niya, very productive and effective. Gisunod kini sa tricities sa Sugbo hangtod karon.

Kay namatud-ang isog nakig-away sa COVID-19 ug inanayng mipabangon sa katikyaboonon nang ekonomiya.

Tan-awa, ang Manila nga misunod sa tanang kamandoan sa NIATF, mihinay ba ang pagtinakdanay? Lantawa ang Sugbo, nga gikortehan ni Gob. Gwen ang health protocols nga alang kaniya makadaot, dili ba, mi-survive, stay strong and alive?

Unya, ikiha na hinuon?  Si Garcia sama sa maayong hardinero. Gustong mabuhi iyang mga tanom nga giatake sa dangan.

Pero, kining mga tawong gusto mokiha niya, sila ang laing matang sa dangan, kinsa inay moluwas sa kinabuhi’g kapanginabuhian, nagplano hinuong tiwasan!

Pahinumdom-kablit. Ang mibuhat og matarong dapat suportahan. COVID-19 atong kontra.

Dili si Inday Gwen. Dili ron panahon sa kinihaay. Kondili, sa atong hiniusang pagtinabangay.