EDITORYAL - Mga politiko diha sa social media

Sama sa gibuhat kaniadtong nagpadung pa ang 2016 national elections sa Pilipinas, daghang mga politiko karon ang nigamit sa social media aron magpahinumdom ug magpaila sa ilang kaugalingon ug kauban na niini ang pagpadungog-dungog.

Dunay uban nga bisan og klaro kaayong dili hanas mogamit sa social media, duna silay gipangkuha nga mga tawong maoy administrador sa ilang Facebook accounts aron maoy mopadagan niini kada adlaw.

Gibuhat kini sa pipila ka mga nakadaog sa nakalabay nga eleksyon mao nga subli nila kining gamiton karon sunod nga piniliay sa 2022.

Sumala pa sa report sa Philippine Center for Investigative Journalism sugod palang niadtong Agosto 2020 milyones ka pesos na ang gibubo aning maong mga politiko para niining ilang pagpaila gamit ang social media.

Sa mga wala masuhito, libre lang kining mag-post sa Facebook ug YouTube  kun pang personal lang nga gamit ug dili pang-negosyo o pagpaila sa tanan.

Mahimong bayran ang Facebook niadtong gustong moabot og milyones ka Facebook accounts mapatik ang ilang posts pinaagi sa pagpa boost sa post.

Advertising
Scroll to continue

Kun kining mga politiko nagsige na gani og lugwa diha sa Facebook nagpasabot kini nga migasto na sila og dako para lang niini.

Ang pandemiya ug mga restriksyon nga gipatuman sama sa pagdili anang mga tapok-tapok sa mga tawo makapasamot kini sa mga politiko nga gamiton ang social media.

Mapuno na sab og mga political advertisement ug mga posts bahin sa mga kandidato ang social media karong mosunod nga mga bulan.

Sa nakalabay nga eleksyon sa 2016 nakita kun unsa kakusog ang social media pag-impluwensiya sa mga botante. Gikan sa pagpangdaut sa mga kontra hangtud sa pagpahumot sa kaugalingon.

Daghan ang naabot sa pagpangampanya pinaagi sa social media. Subo lang kay dili tanang gi-post sa mga kandidato kaniadto tinuod apan mao kadtong instrumento nganong nakalingkod sila karon sa pwesto.

Sa 2022 elections, maayo unta og gamiton na og maayo sa mga tawo ang ilang panghunahuna og moralidad aron timbang-timbangon kun kinsay mas angayan botaran ug dili ibase sa gidaghanon sa nabasa nilang post bahin sa politikong gihisgutan.

Show comments