EDITORYAL - STL booths murag uhong nanurok

Kapin P10 milyones kada adlaw ang nawala sa Philippine Charity Sweepstake Office (PCSO) tungod aning daw mga uhong nga nanubong Small-Time Lotto outlets diha sa kadalanan.

Ang maong alkanes gikan sa Mandaue City ug sa Cebu City. Sa Cebu City maoy kinadaghanan og mga STL outlets matud pang PCSO  General Manager Royina Garma mao nga moabot P8 milyones ang alkanse sa ilang ahensiya kada adlaw.

Hagbay rang gireklamo sa usa ka barangay kapitan sa North District kining mga STL outlets nga gipamutang diha sa ilang barangay. Bisag asa nalang dunay makitang gagmay’ng outlet nga gipintalan og yellow.

Apan imbes nga STL number combinations subay sa ilang kontrata sa PCSO,  nagpataya sab sila og Swertres nga unta ekslusibo ra kini sa mga PCSO Lotto Outlets. Wala man masayop si Garma nga relax lang kaayo ang mga polis batok aning mga STL booths. Walay nangronda o nanakop kanila maong pwerte nang daghana ang uban nakaali sa hagip-ot nga agianan.

Ang STL results anhi ra sa lokalidad bolahon ug dili ang sa PCSO gikan. Bugtong ang PCSO Lotto outlets ray makabaligya og number combinations sa Swertres, 2D, 3D, lotto, etc. Sa Cebu City, si Cebu City Mayor Edgardo Labella nimando na sa Cebu City Police Office nga pangusgan ang kampanya batok aning mga illegal STL booths ug tanang matang sa ilegal nga sugal.

Daghang mga tawo ang nagumon na karon aning Swertres ug dili sa STL apan kadaghanan sa mga namusta aning Swertres adto man sa mga STL booths kay mao may daghan karon bisan asang suok dili parehas sa PCSO outlets.

Kay wala man tugoti ang STL booths pagpapatad og Swertres, asa man padung ang kwarta sa namusta? Maalkanse gyud ang PCSO kada adlaw.

Kun ang tanang kitaon napadulong pa unta sa PCSO, mas daghang mga kabus ang matabangan ilabi na kadtong dunay mga balayrunon sa hospital bills ug uban pang proyektong para sa mga kabus.