Hapit mapilde ang China
Nangandak si National Security Adviser Hermogenes Esperon nga nagkabuagya sa pagsibat ang mga Chinese militia vessels nga nagpundo sulod sa Philippines’ exclusive economic zone human kini hagita ug badlonga sa Philippine Coast Guard. Dili malilong nga layo ra ang pwersa sa atong coast guard itandi sa pwersa sa China. Magdahum na lang nya ta nga mangayo og dispensa ang Pilipinas human niining hitaboa, sama sa gibuhat ni Sec. Locsin. Makapahinumdom kini sa estorya sa dula sa basketbol tali sa Pilipinas ug China diin nakatuaw ang usa ka tumatan-aw sa pag-ingon, “Maayo lage modula ang China, pero sa dihang naninuod na pagduwa ang players sa Pilipinas, dah, hapit lage mapilde ang China”. Pagkatoytoy!
WALAY KRIMEN PERO NAGUTMAN
Matud pa sa PNP, mikunhod og 21% sa buwan sa Abril ang gidaghanon sa kaso sa homicide sa nasud. Gani dili lang kaso sa homicide ang mikunhod sa buwan sa Abril kon dili lakip na usab ang uban’g krimen sama sa murder, robbery, rape, car thefts ug pagpangawat og motorsiklo. Tungod sa lockdown, sama ra nga gipreso ang katawhan lakip na ang mga dautan. Dili na makahimo’g salaod kadtong naa sulod sa presohan. Tungod sa lockdown, nimenos tingale ang krimen apan midaghan usab ang nagutman. Sa dili madugay, tungod unya sa kagutom, modaghan pagbalik ang krimen. Tujok-tujok lang!
NAAY TINUOD NGA HINUNGDAN
Segun sa usa ka pagtuon, ang mga bata nga nagpangedaron ug 6 ngadto sa 8 anyos nga nahiagom sa lockdown sulod sa unom ka buwan, dako ang purohan nga mobati og myopia o nearsightedness. Ang pagpunay’g gamit sa laptop ug mga computer gadgets maoy usa sa gitumbok nga hinungdan sa myopia. Matud pa sa akong higala’ng pilosopo, kon palawman pa unta sa pagtuon ang hinungdan sa myopia sa kabataan, hayan mosangput kini ngadto sa bulay-og nga mga opisyales nga nagpatuman sa lockdown ug uban’g higpit nga lagda nga walay hingpit nga pagtuon ug pag-analisar sa sitwasyon bisan kapin na sa tuig ang pandemiya. Mora’g may punto akong amigo. Saoonz!
GIHIMONG BASURAHAN
Ang dili sakto nga paghipos ug paglabay sa ginamit nga facemasks nahimong hulga ngadto sa kalikopan. Kamatuoran niini, adunay pundok sa mga divers nga nakakolekta’g kapin 200 kilos nga basura sa kadagatan ug kabaybayonan sa Batangas, diin sagad niini mga surgical facemasks. Kanunay nag-awhag ang DENR sa publiko sa hustong paglabay sa basura. Ginaingon nga ang hinungdan sa tanan’g basura sa kalibutan mao lamang kadto’ng pipila ka mga hanggaw ug bulay-og. Walay tawo nga buot mopuyo sulod sa trash can busa hunongon na nato ang paghimo sa kalibutan nga usa ka dakong basurahan. Madahaan!
- Latest