Way kaluoy

Mga doktor, nurses ug ubang medical frontliners ang nag-unang sundawo sa katawhan pagpakig-asdang niining kalibotanong gubat batok sa pandemiya.

Sa kalisod ug kapeligro sa maong tahas nga ilang gisoong matag-adlaw, pagdasig ug suporta ray ilang gikinahanglan.

Wala gani sila mangayo og dugang suholan bisan nag-ungaw sa kapeligro ang ilang kinabuhi.

Tungod niini giisip silang atong mga modernong bayani. Apan subo nga palandungon nga luyo sa pag-ulog ulog kanila sa atong mga opisyal, ang kamatuoran nagpabilin nga wala madawat sa atong mga medical frontliners ang suporta nga angayan alang sa mga modernong bayani.

Daghan nila wala mabayri sa gisaad sa gobiyerno nga hazard pay.

Apan ang labing dakong iskandalo mao ang kapakyas sa kagamhanan sa dakbayan sa Sugbo pagpanuweldo sa mga job order nurses niini sulod na sa upat ka buwan.

Ang pangulo sa Cebu City Medical Center nanghunaw sa kalangan sa sweldo ug mipasa sa responsibilidad ngadto sa City Hall.

Si City Administrator Floro Casas, Jr. mipasalig nga sunod semana madawat na sa mga nurses ang ilang sweldo.

Hinaut matuman na ang maong saad sanglit dili ni unang higayon nga mipasalig ang mga opisyal sa dakbayan. Matud sa usa sa mga nurses nga mireklamo nga gisigihan lang sila og saad hangtud nga niabot nalang og upat ka buwan.

Ang kapakyas sa dakbayan pagsweldo sa mga nurses nagpakita sa ka inutil sa pamunoan.

Angayang manubag ang responsable sa maong kalangan. Dili matukib ang kahasol ug kasakit nga nahiaguman sa mga nurses tungod sa maong palpak.

Way kasingkasing ug kaluoy ang mga opisyal sa dakbayan ngadto sa mga medical frontliners nga ilang gipaantos.

Hinaut nahunahuna sa mga opisyal sa dakbayan nga sama nila mokaon sab og katulo sa usa ka adlaw ang maong mga nurse.

Magkutoy sab ang ilang tiyan matag oras sa tingkaon ug may mga obligasyon sab sila matagbuwan nga kinahanglang bayran.

Ug labaw sa tanan angayang sayran ni Mayor Edgardo Labella ang publiko unsa bay tinuod nga kahimtang sa panudlanan sa dakbayan nganong dili ni ka panuweldo sa uban niyang mga kawani sa tukmang panahon.