Nag-viral sa social media ang insidente sa Lugaw sa usa ka baranggay didto sa Bulacan dihang gipugngan kini sa mga opisyal sa barangay ang delivery man nga ihatod ang lugaw sa nag-order niini.
Katarongan sa opisyal sa barangay nga dili essential ang lugaw kay mabuhi man ang tawo kong walay lugaw.
Gamay alang sa uban ang lugaw apan nahimo kining national issue sanglit halos tanan naka-relate nga ang lugaw essential gyud, bisan ako moingon nga gikinahanglan gyud ang lugaw.
Tinuod man kay ang lugaw dili lang comfort food kay para nako daghan kini og simbolo sama sa gugma sa inahan ngadto sa anak. Kong maglain ang lawas sa anak maglugaw dayon ang inahan kay maoy ipakaon sa anak.
Sa dili pa hatagan og gahi nga pagkaon ang bata lugaw una ang ipakaon. Ang mga tiguwang nga dili na makabangon ug maglisod sa pagtulon sa kan-on lugaw gyud ang ipakaon.
Sa mga kabus nga nag-ilaid na sa kalisod, walay kapilian kon dili lugawon nalang ang gamayng bugas aron maapod ang mga miembro sa pamilya nga makakaon tanan.
Mao kini ang sitwasyon karon sa atong nasud. Daghan ang gipanggutom kay nawad-an sa trabaho sanglit nagsira naman ang mga kompanya nga gialagaran.
Gustohon man nga mokaon ug gahing kan-on apan mas gipili nga lugawon aron maka survive.
Sa kaulohan diin gilugwayan ang enhanced community quarantine, dili ko ka imagine sa kalisod nga nahiaguman sa mga tawo.
Dili kaigo ang ayuda sa gobiyerno nga ikasuporta kanila. Tinuod posibleng mapugngan ang pagtaas sa kaso sa COVID-19 sa lockdown apan dakong kalbaryo sa mga hingtungdan ang ilang sitwasyon.
Maayo gani diri sa Cebu napangitaan og pamaagi aron dili moburot ang kaso sa COVID-19 diin usa niini ang pagmintinar sa mga healthcare facility nga dili mapuno.
Ang kadtong mga severe o grabe nga COVID-19 case ang isulod sa hospital ug kadtong mild puwede ra sa mga isolation faclity aron dili maghuot ang mga ward.
Misanong man sad seguro ang mga Sugboanon sa panawagan kay wala man ma-overwhelmed ang mga tambalanan.
Ambot kong mao ba sad ni ang gihimo sa kaulohan. Apan kong tan-awon nato ang balita sa NCR makahadlok na gyud labi na kong mo-focus ta sa numero nga niabot na og lapas sa 10 mil kada adlaw nationwide.
Pila man ka porsiyento kaha niini ang moderate ug severe case? Sa akong pagsabot majority niini mga asymtomatic o walay gipamati.
Kong ang basehan sa pagpatuman og mas higpit nga quarantine status aw dili na gyud ka move on ang nasud, mag sige nalang og lockdown.
Kini maghatod lang sa tumang kalisod sa mga tawo nga bisan lugaw dili na makahimo kay dili naman maigo ang ayuda sa gobiyerno.
Mao bitaw nga naay magmarka bahala nalang sa paghimo og mga butang aron mabuhi ang pamilya.
Usa man ang Cebu sa dunay daghang kaso sa COVID-19 apan pasalamat ta sa mga local government officials nga gibalanse nila ang pagpatuman sa protocol ug ang panginabuhi sa mga tawo nga dili mosangpot sa dugang kalisod.
Busa abagan usab aron dili kita mamahimong sama sa kaulohan. Hinuon atong mahimo karon mao ang pag-amping ug pag-ampo nga maoy balikbalikon nako sa pag-apil niining akong lindog.