700 ka pamilya

Gitakda unta kagahapon ang groundbreaking alang sa P5.5 bilyones nga proyekto paghimong moderno sa Carbon Public Market, apan way kalihokan nga nahitabo human nabisto atol sa special session sa konseho sa dakbayan niadtong Lunes ang kwestiyonableng pagpalabang sa Joint Venture Agreement tali sa dakbayan sa Sugbo ug sa Megawide Construction Corporation.

Ang konseho mipasar niadtong Enero 6, 2021 sa JVA nga gipirmahan ni Mayor Edgardo Labella ug sa mga opisyal sa Megawide niadtong Enero 11. Apan nabisto nga sagad sa mga konsehal wala diay masayod sa batakang probiso sa agreement nga gisudlan sa dakbayan uban sa developer sa merkado.

Usa sa makadisturbong kasayoran mao nga ang tibuok lumulopyo sa Sitio Bato, Barangay Ermita maapektuhan sa proyekto. Gibanabana nga moabot sa 700 ka pamilya ang namiligrong mawad-an og pinuy-anan kun mahinayon ang proyekto.

Wala pa ni labot sa mga tindiro ug tindira kang kansang mga panginabuhian hayan mawagtang tungod niining maong proyekto. Ang Megawide Corporation sa sayo pa mipadayag nga plano nilang ibalhin una ang mga apektadong tindiro ug tindira samtang magpadayon ang proyekto.

Apan way klaro unsay plano sa dakbayan ug sa Megawide sa 700 ka mga pamilya nga mawad-an og pinuy-anan.  Ang nakalisod niini tungod kay duna nay kontrata nga gipirmahan ang dakbayan. Sa madugay ug sa madali obligado ang kagamhanan sa dakbayan nga tumanon ang kontrata nga ilang gisudlan.

Dakong kompromiso ang posibleng atubangon sa dakbayan tungod sa pagsulod nila og kontrata nga wala tun-i og maayo ang kasabutan sa wala himoa ang pinirmahay. Ang mga sakop sa konseho dunay dakong obligasyon sa mga residente sa Ermita tungod sa ilang kapakyas pagsiguro nga kaprotehian ang interest sa katawhan sa wala pa mohatag og pagtugot sa mayor nga mopirma sa kontrata.

Dinhi makita kinsa sa atong mga konsehal ang tinuod nga mga representante sa katawhan diha sa konseho. Subo nga hunahunaon nga sagad nila way kaugalingon nga baruganan ug igo lang moyango unsay isugo bisan wala masayod unsay samputanan sa ilang gihimo.