Mandaue City ang kinadaghanan og patay sa COVID-19 kon ipasikad sa kinatibuk-ang ihap sa iyang mga residente nga nataptan sa kagaw.
Gibutyag ni sa Department of Health (DOH) sa ilang inadlaw nga pagsubay sa case fatality rate (CFR) sa COVID-19 sa nagkalainlaing bahin sa nasud.
Sa ihap sa DOH hangtod niadtong Miyerkules, Marso 3, niabot og 178 ang namatay sa 4,235 ka taga Mandaue nga napamatud-ang positibo sa kagaw.
Ang 4.2% nilang CFR maoy kinatas-an sa tibuok Central Visayas. Nalabwan ang mga dapit nga mas daghan og kaso.
* * *
Niang mga dapit sa Sugbo nga mas daghan og kaso sa COVID-19 nga natino sa DOH nga mas ubos og CFR:
Ang Cebu City nga may 18,124 ka kaso, ang kinadaghanan sa tibuok rehiyon, dunay 717 nga nangamatay, o 3.96% nga CFR;
Ang Lapu-Lapu City nga may 4,333 ka kaso dunay 117 nga patay, o 2.7% nga CFR; ug
Ang labing sikit og CFR sa Mandaue mao ang probinsiya sa Sugbo nga may 10,943 ka kaso ug 438 nga patay, o 4% nga CFR.
* * *
Di ikapanghambog ang taas nga CFR sa Sugbo kon itandi sa mas ubos nga CFR sa tibuok nasud: 2.13% nga dakong tibugsok gikan sa 6% sa pagsulbong sa mga kaso sa niaging tuig. Mas ubos pa gyod ang CFR sa Metro Manila: 2.01%.
Mapaubos lang ang CFR kon molambo ang kalidad sa pag-atiman sa mga ospital sa mga pasyente.
Dakong tabang kon matultolan ug matambalan dayon ang mga pasyente sa di pa mograbe.
* * *
Mas ubos sab sa Mandaue ang CFR sa tibuok isla sa Sugbo: 3.77% (sa 38,421 ka kaso, 1,450 ang patay).
Mas ubos pa gyod ang CFR sa tibuok Central Visayas: 3.69% (sa 41,273 ka kaso, 1,524 ang nangamatay).
Nakapabira paubos sa mga numero sa rehiyon ang CFR sa Bohol nga mas ubos kay sa Metro Manila ug tibuok nasud: 1.42% (sa 1,404 ka kaso, 20 ang patay).
Labaw lang og diyutay sa Bohol pero ubos kaayo sa Sugbo ang CFR sa Negros Oriental: 2.67% (sa 1,949 ka kaso, 52 ang patay).
* * *