Unsay kaso nga atubangon sa bana nga kaduha nagpakasal

Dear Atty. Divine,

Ang akong igsuon nagpakasal sa iyang boyfriend human kini nabuntis. Di pa sila tantong dugay nga nagkaila ug tungod kay  nabuntis siya mi offer kaniya ang boyfriend nga pakaslan siya og misugot sab ang akong igsuon. Karon nahibaw-an sa akong igsuon nga naa diay laing pamilya ang iyang bana ug siya mismo ang nakadiskobre niini human siya gikontak sa anak sa iyang first wife pinaagi sa Facebook. Tulo ka tuig na silang kasal. Apan karon nahadlok ang akong igsuon nga iapil unya siya sa pagpasaka og kaso sa unang asawa . Ang akong pangutana kun pwede bang makiha ang bana sa akong igsuon nga kaduha nagpakasal? Maapil ba ang akong igsuon sa pagkiha?  Daghang Salamat. — Gina

* * *

Dear Gina,

Mamahimong mapasakaan og kasong Bigamy ang bana sa imong igsuon basi sa Article 349 sa Revised Penal Code tungod sa iyang gihimo nga makaduha nagpakasal. Ang imong igsuon mamahimong maapil sa pagpasaka og kaso kun nasayud siyang daan nga minyo diay ang iyang gipakaslan. Apan sa kaso sa imong igsuon, wa siya masayod nga minyo ang iyang gipakaslan. Basi sa mga nahaunang desisyon sa Korte Suprema kini nagkanayon nga kun ang ikaduhang asawa way kasayuran labot sa first marriage sa dihang siya nagpakasal niini then wa siyay tulubagon og di siya maapil sa kasong Bigamy. Sa ato pa, mamahimong depensa sa imong igsuon nga wa siya masayod sa first marriage aron siya makalingkawas sa maong tulubagon kun sila ikiha sa unang asawa. Thanks and God Bless.

Atty. Divine

* * *

Alang sa inyong pangutana, palihug lang sa pag-email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.