EDITORYAL - Nauwahi sa bakuna

Malipayong gianunsyo sa gobiyerno ang vaccine rollout human naabot na gyud ang labing unang batch sa Covid-19 vaccine niadtong adlaw nga Domingo.

Sa napulo ka miyembro sa Association of Southeast Asian Nations (ASEAN), ang Pilipinas maoy kataposang nakadawat sa bakuna batok sa Covid-19. Ang uban sama sa Indonesia ug Singapore niadto pang bulan sa Disyembre nagsugod na sa pagpamakuna sa ilang katawhan.

Gawas nga dunay kalangay sa pag-order, tanang mga nasud gawas nalang kung diin gikan kining mga bakuna nanigurado nga makauna sa pag-order.

Ang bakuna nga naabot adtong Domingo mao ang Sinovac gikan sa China. Giingong 600 mil kini nga dosage paigo sa 300 mil ka mga Pilipino. Matud pa duha ka dosage ang gikinahanglan kada tawo sa bakuna sa Sinovac.

Gipaabot unta kagahapong adlawa sab maabot ang gibanabanang kapin 500 mil doses nga AstraZeneca vaccine nga sama sa Sinovac donasyon gihapon gikan sa World Health Organization COVAX Facility.

Apan tungod sa kanihit sa supply niini malangan pa og usa ka semana ayha kini mapadala dinhi sa Pilipinas.  Angay sab masayran sa publiko nga kining maong mga bakunang nangabot karon pulos pa ni donasyon .

Kaning Sinovac napadala dayon usa ka adlaw human giaprubahan sa Food and Drugs Administration ang aplikasyon niini nga mahatagan og Emergency Use Authorization.

Ang World Health Organization COVAX Facility mitagana og mga donasyong bakuna alang sa mga kabus nga mga nasud sama sa Pilipinas.

Apan ubos sa kondisyon nga protektahan kining mga vaccine manufacturers gikan sa legal nga tulobagon kun dunay dili maayong epekto ang ilang bakuna nagdto sa turokan niini.

Kani  man gud tanang mga bakuna nga gi-rollout sa WHO uban sa partisipasyon sa nagkadaiyang mga gobiyerno naa pa sa 3rd clinical phase o ang pag-testing niini sa mas lapad nga populasyon.

Ning bag-ohay lang, gipirmahan ni Pres. Duterte ang Indemnity Law nga diin ang gobiyerno maoy moabaga sa tanang balayrunon o danyos kun pananglitan mapamatud-ang ang bakuna nagbunga og dili maayo sa pasyenteng giturokan niini.

Gikinahanglan kini tungod kay dili mosugal ang mga pharmaceutical companies kung dili sila protektado.